लक्ष्मीपूजनाच्या दिवशी फटाक्यांच्या आतषबाजीमुळे राज्यभरात आगीच्या अनेक घटना घडल्या. मुंबई, ठाणे आणि पुणे जिल्ह्यासह पिंपरी-चिंचवड, नागपूर आणि भिवंडीमध्ये आग लागल्याच्या घटना समोर आल्या. त्यामुळे अग्निशमन दलाची रात्रभर धावपळ झाली.
पिंपरी-चिंचवडमध्ये ५० ठिकाणी आग
पिंपरी-चिंचवड शहरात लक्ष्मीपूजनाच्या दिवशी आगीच्या तब्बल ५० घटना घडल्या. त्यात घरांना लागलेल्या आगीच्या २० घटना होत्या, तर मोकळ्या मैदानातील गवत, कचरा आणि झाडांना आग लागण्याच्या २५ घटना घडल्या. फ्लेक्स, कंपाऊंड आणि टॉवरला आग लागण्याच्या ५ घटनाही यात होत्या. सुदैवाने एकाही घटनेत जीवितहानी झाली नाही. अग्निशमन विभागाने तत्परतेने आगीवर नियंत्रण मिळवण्याचे प्रयत्न केले.
नागपुरात शोरूममधील ५० दुचाकी जळाल्या
नागपुरात फटाक्यांमुळे तीन ठिकाणी आग लागली. सावरकर नगर येथील टीव्हीएस शोरूमला रात्री आग लागली आणि या आगीत ५० दुचाकी जळून खाक झाल्या. त्यामुळे मोठे आर्थिक नुकसान झाले. फटाक्यांमुळेच शोरूममध्ये आग लागल्याची माहिती आहे.
मुंबई, ठाणे आणि भिवंडीतही घटना
मुंबई उपनगरात रात्री तीन ठिकाणी आग लागली. जोगेश्वरीतील जेवीएलआरवर वेस्टर्न एक्सप्रेस हायवेजवळ आग लागली, तर अंधेरीतील मरोळ मिलिटरी रोडजवळ लेव्हल २ ची आग लागली. मालवणीमध्येही आगीची घटना घडली. या घटनांमध्ये कोणीही जखमी झाले नाही, मात्र जेवीएलआरची आग मोठी होती.
भिवंडीत लक्ष्मीपूजनानंतर फटाके फोडल्याने रात्री अकरा वाजेपर्यंत पाच ठिकाणी आग लागली. पहाटेच्या सुमारास कोंबड पाडा येथील पार्वती मंगल कार्यालय जळून खाक झाले. यात जीवितहानी टळली असली, तरी मोठ्या प्रमाणावर नुकसान झाले. ठाण्यात रात्री लागलेल्या आगीच्या घटनेची उपमुख्यमंत्री एकनाथ शिंदे यांनी स्वतः दखल घेतली.
स्रोत: मूळ बातमी
Leave a Reply