नवादे वस्तीवर माणुसकीच्या दिव्यांनी उजळली दिवाळी!

मालेगाव तालुक्यातील गाळणे येथील नवादे वस्तीवर आदिवासी बांधवांसोबत दिवाळी साजरी करत शालेय शिक्षण मंत्री दादाजी भुसे यांनी दुष्काळाच्या काळात शासन आदिवासी कुटुंबांच्या पाठीशी खंबीरपणे उभे असल्याचा विश्वास दिला. केवळ सणाच्या शुभेच्छा देण्यापुरते मर्यादित न राहता त्यांनी वस्तीवरील कुटुंबांशी मनमोकळा संवाद साधला, त्यांच्या समस्या जाणून घेतल्या आणि शासनाच्या मदतीचा विश्वास दिला.

दुष्काळी परिस्थितीमुळे पाणीटंचाईची चिंता, पशुधनाच्या चाऱ्याचा प्रश्न आणि रोजगाराची विवंचना अशा अनेक आव्हानांना सामोरे जाणाऱ्या आदिवासी कुटुंबांच्या चेहऱ्यावरही दिवाळीचा आनंद फुलावा, त्यांच्या मनातील चिंतेचे मळभ दूर व्हावे, या संवेदनशील भावनेतून मंत्री श्री. भुसे यांनी ही भेट दिली. दुष्काळाच्या काळात शेतकरी, शेतमजूर आणि आदिवासी कुटुंबांच्या रोजच्या जगण्यातील संघर्षाची जाणीव ठेवून शासन विविध उपाययोजना करीत असल्याचे त्यांनी सांगितले. अशा परिस्थितीत कोणीही एकटे नाही, शासन त्यांच्या सुख-दुःखात सहभागी आहे आणि आवश्यक मदतीसाठी ठामपणे त्यांच्या पाठीशी आहे, हा दिलासा त्यांनी प्रत्यक्ष संवादातून दिला. नवादे वस्तीवरील नागरिकांशी संवाद साधताना त्यांनी महिला, माता-भगिनी आणि ग्रामस्थांच्या अडचणी आत्मीयतेने ऐकून घेतल्या आणि त्या आगामी काळात प्राधान्याने सोडविण्यासाठी पाठपुरावा करण्याची ग्वाही दिली.

पाणी, चारा आणि रोजगारासाठी वर्षभराचे नियोजन

दुष्काळाच्या पार्श्वभूमीवर आगामी वर्षभराचे नियोजन करण्यात आले आहे. ऑगस्टअखेरपर्यंत पिण्याच्या पाण्याची उपलब्धता कायम राहावी, पशुधनासाठी पाणी आणि चाऱ्याची व्यवस्था व्हावी, तसेच ग्रामीण भागातील नागरिकांच्या हाताला काम मिळावे, यासाठी आवश्यक उपाययोजना करण्यात आल्याची माहिती मंत्री श्री. भुसे यांनी दिली. दुष्काळाच्या संकटात नागरिकांना दिलासा देणे, त्यांच्या मूलभूत गरजा पूर्ण करणे आणि रोजगाराच्या माध्यमातून त्यांच्या कुटुंबांना आर्थिक आधार देणे, याला शासनाचे प्राधान्य असल्याचा विश्वास त्यांनी व्यक्त केला.

वनजमिनीच्या प्रश्नातून विकासाच्या योजनांचा मार्ग मोकळा

नवादे वस्तीचा परिसर पूर्वी वन विभागाच्या अखत्यारीत असल्याने येथील नागरिकांना घरकुलासह विविध मूलभूत सुविधा आणि शासकीय योजनांचा लाभ मिळविताना अडचणी येत होत्या. मात्र, काही वर्षांपूर्वी वन विभागाची कायदेशीर परवानगी घेऊन ही जागा ग्रामपंचायतीच्या नावे करण्यात आली. त्यामुळे आता येथील आदिवासी बांधवांना घरकुलांसह विविध शासकीय योजनांचा लाभ मिळण्याचा मार्ग सुकर झाला आहे.

शेतकरी कुटुंबांच्या अंगणात आपुलकीचा दिवाळी फराळ

मंत्री श्री. भुसे यांनी नवादे वस्तीवरील शेतकरी जीवन दाजी पवार यांच्या घरी भेट देऊन सर्वधर्मीय ग्रामस्थांसोबत दिवाळीच्या फराळाचा आस्वाद घेतला. पवार कुटुंबीयांनी औक्षण करून त्यांचे आत्मीयतेने स्वागत केले. त्यानंतर राजाभाऊ जीभाऊ पवार यांच्या घरीही त्यांनी भेट दिली. यावेळी अहिराणी भाषेतून कुटुंबीयांशी संवाद साधत त्यांनी स्थानिक बोलीभाषेतील आपलेपणा जपला. घराच्या शेणाने सारवलेल्या अंगणात सुंदर रांगोळी साकारणाऱ्या बालिकांचे त्यांनी कौतुक केले. दोन्ही कुटुंबांना दिवाळीनिमित्त भेटवस्तूंचे वाटप करण्यात आले.

अंगणवाडीतील चिमुकल्यांच्या चेहऱ्यावर आनंदाचा प्रकाश

नवादे वस्तीवरील अंगणवाडी केंद्रालाही मंत्री श्री. भुसे यांनी भेट दिली. चिमुकल्यांनी उत्साहात त्यांचे स्वागत केले. बालकांनी कविता सादर करून उपस्थितांची मने जिंकली. मंत्री श्री. भुसे यांनी त्यांच्याशी संवाद साधत कौतुक केले. तसेच बालकांना नवीन कपडे, भेटवस्तू आणि खाऊचे वाटप केले.

सामाजिक एकोप्याची परंपरा जपणारे गाळणे

गाळणे गावात सर्व समाजांचे नागरिक गुण्यागोविंदाने राहतात. सर्व धर्मीयांचे सण आणि उत्सव एकत्रितपणे साजरे करण्याची येथील परंपरा सामाजिक सलोख्याचे सुंदर उदाहरण आहे. गेल्या चार-पाच वर्षांपासून दिवाळीनिमित्त नवादे वस्तीवर एकत्र येऊन स्नेहभोजन आणि छोटेखानी कार्यक्रम आयोजित करण्याची परंपरा जपली जात आहे. यंदा दुष्काळी परिस्थिती असतानाही ही परंपरा कायम ठेवण्यात आली. यावेळी ग्रामसेवक अशोक शेवाळे, पर्यवेक्षिका ज्योती देसाई, अंगणवाडी सेविका सुनंदा गांगुर्डे, मदतनीस मंदा जाधव यांच्यासह नवादे वस्तीवरील ग्रामस्थ उपस्थित होते.

फोटो गॅलरी