यंदा एल निनोमुळे मान्सूनचा खेळ बिघडला. जूनच्या शेवटच्या आठवड्यात आणि संपूर्ण जुलै महिन्यात चांगला पाऊस झाला, मात्र त्यानंतर एल निनोचे सावट अधिक गडद होत गेले आणि पाऊसच झाला नाही. संपूर्ण पावसाळा कोरडा गेला. ऑगस्ट, सप्टेंबर आणि ऑक्टोबर महिन्यात पावसाने दडी मारली. पाऊस न झाल्यामुळे खरीप हंगाम हातचा गेला, तर रब्बी हंगामातील पिकांच्या पेरणीलाही पुरेसा पाऊस मिळाला नाही. त्यामुळे शेतकरी अजूनच संकटात सापडले.
पाच हजार रुपयांची आगाऊ मदत
यंदा शेतीत उत्पन्नच न निघाल्याने जगायचे कसे, असा प्रश्न शेतकऱ्यांसमोर उभा आहे. अन्नधान्य टंचाईसोबतच जनावरांच्या चाऱ्याचीही भीषण टंचाई निर्माण झाली आहे. त्यामुळे बळीराजा हातबल झाला आहे. दरम्यान, निराश झालेल्या शेतकऱ्यांना दिलासा मिळावा यासाठी काही दिवसांपूर्वीच सरकारने आगाऊ मदत म्हणून पाच हजार रुपयांची घोषणा केली होती. राज्यातील जवळपास सर्वच शेतकऱ्यांच्या खात्यामध्ये ही रक्कम जमा होण्यास सुरुवात झाली आहे. या पैशांमुळे शेतकऱ्यांना थोडा दिलासा मिळाला आहे.
पाणंद रस्त्यांसाठी ११६ कोटींचा निधी
दरम्यान, राज्य सरकारच्या वतीने आणखी एक मोठी घोषणा करण्यात आली आहे. मातोश्री ग्रामसमृद्धी शेत पाणंद रस्ते योजनेंतर्गत ११६ कोटी रुपयांचा निधी वितरित करण्यात आला आहे. रोजगार हमी योजनेंतर्गत या निधीचे वितरण करण्यात आले आहे. या निधीमुळे रखडलेल्या शेत पाणंद रस्त्यांच्या कामांना गती मिळणार आहे. शेतापर्यंत बारमाही रस्ते उपलब्ध करून देण्यासाठी शासनाने पुढाकार घेतला आहे. या कामांमुळे दुष्काळात शेतकरी आणि शेतमजुरांना रोजगार उपलब्ध होणार आहे. त्यांच्या हाताला स्थानिक पातळीवरच काम मिळणार असून दुष्काळामुळे होणाऱ्या स्थलांतरालाही काही प्रमाणात आळा बसू शकतो. ग्रामीण भागातील पायाभूत सुविधांची कामे वेळेत पूर्ण करण्यावर सरकारचा भर आहे, अशी माहिती मंत्री भरत गोगावले यांनी दिली आहे.
स्रोत: मूळ बातमी
Leave a Reply