मुंबई लोकलमध्ये प्रवाशांमध्ये तुफान हाणामारी झाल्याची धक्कादायक घटना समोर आली आहे. या हाणामारीमध्ये एक प्रवासी चक्क धावत्या ट्रेनमधून खाली पडला आहे. ही घटना चर्चगेट-विरार फास्ट लोकलमध्ये गुरुवारी रात्री साडेदहाच्या सुमारास घडली. ग्रँट रोड आणि मुंबई सेंट्रल स्थानकादरम्यान दरवाजात उभे राहण्यावरून वाद झाल्याची प्राथमिक माहिती आहे. याच वादाचे रूपांतर हाणामारीत झाले. दरम्यान मारहाणीदरम्यान एक प्रवासी धावत्या लोकलमधून खाली पडला. मात्र मुंबई सेंट्रल स्थानकाच्या प्लॅटफॉर्मवरून ट्रेन जात असताना वेग कमी असल्याने मोठा अनर्थ टळला. या घटनेचा व्हिडिओ सोशल मीडियावर व्हायरल झाला आहे.
सुरक्षेचा प्रश्न पुन्हा ऐरणीवर
या घटनेमुळे मुंबई लोकलमध्ये प्रवाशांच्या सुरक्षेचा प्रश्न पुन्हा ऐरणीवर आला आहे. दररोज ७५ लाखांहून अधिक, तर काही अंदाजानुसार जवळपास एक कोटी नागरिक लोकलने प्रवास करतात. मुंबई लोकलमध्ये अशा प्रकारच्या घटना घडण्याची ही काही पहिली वेळ नाही. यापूर्वीही धावत्या लोकलमध्ये असो वा मुंबईतील लोकल स्थानकांवर, हाणामारी आणि चोरीसारख्या अनेक घटना समोर आल्या आहेत.
लोकललाच का प्राधान्य?
मुंबईतील नागरिक लोकलने प्रवासाला प्राधान्य देण्याचे कारण म्हणजे रस्ते मार्गावरील वाहतूक कोंडीमुळे प्रवासाला जास्त वेळ लागतो, तर लोकल ट्रेन सर्वात वेगवान आणि खिशाला परवडणारी आहे. विरार, कल्याण, पनवेल, ठाणे यांसारख्या दूरच्या उपनगरांना मुंबईच्या मुख्य व्यापारी केंद्रांशी लोकल जोडून ठेवते. त्यामुळेच लोकलचा प्रवास अनेकांना सोपा वाटतो, पण त्याचवेळी सुरक्षित प्रवास हा मोठा मुद्दा बनला आहे.
स्रोत: मूळ बातमी
Leave a Reply