मुंबईतील ब्रीच कँडी रुग्णालयात उपचार घेत असलेले राष्ट्रवादी काँग्रेसचे नेते शरद पवार यांची प्रकृती स्थिर आहे. त्यांना याआधी पुण्यातील रुबी रुग्णालयात दाखल करण्यात आले होते. तेथून सुट्टी मिळाल्यानंतर त्यांना लगेच मुंबईच्या रुग्णालयात दाखल करण्यात आले होते. उद्यापर्यंत त्यांना सुट्टी मिळू शकते, अशी माहिती समोर आली आहे.
गुरुवारी राष्ट्रवादी काँग्रेसचे नेते प्रफुल पटेल यांनी रुग्णालयात जाऊन पवार यांची भेट घेतली. या भेटीचे छायाचित्र आणि व्हिडिओ समोर आले आहेत. त्यात दोघांमध्ये ‘१० तारखेनंतर बोलू’ असा संवाद झाल्याचे दिसून आले. त्यामुळे १० नोव्हेंबरनंतर पवार काय करणार, याबाबत राजकीय वर्तुळात चर्चा सुरू झाली आहे.
जयंत पाटील काय म्हणाले?
या पार्श्वभूमीवर शरद पवार गटाचे प्रमुख नेते जयंत पाटील यांनी महत्त्वाचे भाष्य केले. ‘शरद पवार यांची प्रकृती ठीक आहे. दहा मिनिटे चर्चा झाली. १० नोव्हेंबरनंतर ते अलीबागला कार्यक्रमासाठी येणार आहेत,’ असे पाटील म्हणाले.
दोन्ही राष्ट्रवादी पक्षांचे पुन्हा विलिनीकरण होणार आणि सुप्रिया सुळे केंद्रात मंत्री होणार, अशा चर्चा सुरू झाल्या होत्या. त्यावर पाटील म्हणाले की, विलिनीकरण होणार नाही. याबाबत पवार यांनी आधीच आपली भूमिका मांडली आहे. केवळ अफवा पसरवल्या जात आहेत, असे त्यांनी सांगितले.
दिवाळीनंतर मोठ्या घडामोडी?
गोकुळमध्ये घेतलेला निर्णय लोकशाहीला अभिप्रेत नाही आणि कायद्याचा दुरुपयोग आहे, असेही पाटील म्हणाले. महाराष्ट्रात दिवाळीनंतर मोठ्या घडामोडी घडतील आणि महाविकास आघाडीचे भविष्य उज्ज्वल आहे, असा विश्वास त्यांनी व्यक्त केला.
पवार यांचा रुग्णालयातील फोटो समोर आल्यानंतर त्यांना भेटण्यासाठी नेत्यांची रांग लागली आहे. शुक्रवारी सकाळी बाळासाहेब थोरात आणि उद्योगपती गौतम अदानी यांनी त्यांची भेट घेतली. पंतप्रधान नरेंद्र मोदी यांनी दूरध्वनीवरून त्यांच्या तब्येतीची विचारपूस केली. मंत्री छगन भुजबळ यांनीही गुरुवारी त्यांची भेट घेतली होती. उपमुख्यमंत्री आणि सुनेत्रा पवार याही पवार यांच्या भेटीला रुग्णालयात जाणार आहेत.
स्रोत: मूळ बातमी
Leave a Reply