दक्षिण भारतातील सुप्रसिद्ध मिठाई ब्रँड अन्नपूर्णा मिठाई सणासुदीच्या दिवसांत विशेष चर्चेत असतो. या ब्रँडचे मालक अरुल सुजनेश यांनी आपल्या बुद्धिमत्तेच्या जोरावर या ब्रँडला ३ कोटी रुपयांच्या मोठ्या कर्जातून बाहेर काढत २२ टक्क्यांपेक्षा अधिक नफ्याच्या मार्गावर आणले. व्यवसाय क्षेत्राचा फारसा अनुभव नसतानाही त्यांनी एका बुडत्या व्यवसायाला पुन्हा जिवंत केले.
वडिलांच्या सांगण्यावरून सोडली नोकरी
तामिळनाडूच्या कोईम्बतूर शहरातील एका लहानशा व्यावसायिक कुटुंबात अरुल सुजनेश यांचा जन्म झाला. शहरातच त्यांच्या वडिलांचा अन्नपूर्णा हॉटेल्स नावाने व्यवसाय होता. या व्यवसायाची पायाभरणी त्यांच्या आजोबांनी केली होती आणि तो वडिलांना वारसा हक्काने मिळाला होता. मात्र अरुल यांना व्यवसायात फारसा रस नव्हता. त्यांनी सिव्हिल इंजिनिअरिंगचे शिक्षण घेऊन त्याच क्षेत्रात नोकरी करायला सुरुवात केली.
व्यवसाय कौटुंबिक असल्याने त्याची फाळणी करण्यात आली. पण फाळणीनंतर व्यवसायाची स्थितीच पूर्णपणे बदलली. बुडत्या व्यवसायाला वाचवण्यासाठी वडिलांनी अरुल यांना फोन केला आणि नोकरी सोडून कौटुंबिक व्यवसाय सावरण्याचा सल्ला दिला. अरुल यांनी त्याच क्षणी नोकरीचा त्याग केला.
कर्जात बुडालेल्या व्यवसायाची धुरा हाती घेतली
ज्यावेळी अरुल अन्नपूर्णा हॉटेल्स या कौटुंबिक व्यवसायाशी जोडले गेले, तेव्हा हा व्यवसाय ३ कोटी रुपयांच्या कर्जात बुडाला होता. त्यांचे राहते घर तसेच आईचे दागदागिने, सगळेच धोक्यात होते. या कठीण परिस्थितीत हॉटेल क्षेत्राचा काहीच अनुभव नसणाऱ्या अरुल यांनी व्यवसायाची दोर हातात घेतली.
सुरुवातीला त्यांनी फ्रेंचायझी मॉडेल उभारले, पण त्यात काहीच यश मिळाले नाही. योग्य नियोजनाअभावी त्या सर्व फ्रेंचायझी बंद पडल्या आणि परिणामी व्यवसायावरील कर्ज आणखी वाढले.
गुणवत्तेवर भर दिला आणि यश मिळवले
दुकानांच्या मोठ्या संख्येपेक्षा उत्पादनाची गुणवत्ता सुधारली गेली पाहिजे हे समीकरण अरुल यांना कळून चुकले होते. त्यामुळे त्यांनी इतर दुकाने बंद करून मुख्य शाखेलाच सुधारण्याचा निर्णय घेतला. अन्न सुरक्षा तपासणीनंतर त्यांनी उत्पादन करण्यासाठी खऱ्या फळांच्या गराचा वापर वाढवला.
विशेष म्हणजे व्यवसायाच्या व्यवस्थापकाच्या सहाय्याने त्यांनी समाजमाध्यमांवर स्वतःची वेगळी ओळख तयार केली. त्यांनी समाजमाध्यमांवर जवळपास एकाच महिन्यात ७० हजारांपेक्षा जास्त अनुयायी मिळवले. या वळणावर अन्नपूर्णा मिठाई या ब्रँडला जागतिक ओळख मिळाली.
आजच्या घडीला मदुराई येथील अन्नपूर्णा मिठाईच्या एका मुख्य दुकानातूनच वर्षाला ८ कोटी रुपयांचा महसूल मिळतो. यात २२ टक्के रक्कम निव्वळ नफा आहे. कर्जात बुडालेल्या व्यवसायाला वाचवून तो नफ्यात आणण्याची ही कहाणी अनेक उद्योजकांसाठी प्रेरणादायी ठरते.
स्रोत: मूळ बातमी
Leave a Reply