रणबीर कपूर यांच्या रामायण भाग १ चित्रपटाच्या प्रदर्शनाला आता २४ तासांपेक्षा कमी वेळ उरला आहे. नितेश तिवारी दिग्दर्शित हा भव्य चित्रपट जगभरातील १०० हून अधिक देशांमध्ये ५०,००० पडद्यांवर प्रदर्शित होणार आहे. चित्रपटाचा टीझर, ट्रेलर आणि विशेषतः गाणी समोर आल्यापासून त्यावर विविध प्रतिक्रिया उमटत आहेत. चित्रपटाच्या संगीतमुळे, विशेषतः कव्वालीच्या सुरामुळे अनेकजण निराश झाले असून संगीतकार ए. आर. रहमान यांना समाजमाध्यमांवर टीकेला सामोरे जावे लागले. आता रामानंद सागर यांच्या रामायण मालिकेत लक्ष्मणाची भूमिका साकारणाऱ्या सुनील लहरी यांनीही आपली निराशा व्यक्त केली आहे. मात्र त्यांनी चित्रपटातील कलाकारांच्या मेहनतीचे कौतुकही केले आहे.
अडीच मिनिटांच्या व्हिडिओतून मत मांडले
सुनील लहरी यांनी त्यांच्या एक्स खात्यावर जवळपास अडीच मिनिटांचा एक व्हिडिओ शेअर केला आहे. त्यात त्यांनी म्हटले आहे की, रामायण भाग १ हा मोठ्या खर्चाचा चित्रपट असून त्यावर अनेक लोकांची उपजीविका अवलंबून आहे, त्यामुळे तो यशस्वी व्हावा अशी आपण प्रार्थना करतो. अनेकांनी आपल्याला या चित्रपटाबद्दल मत व्यक्त करण्याचा सल्ला दिला, कदाचित आपण एकेकाळी रामायणाचा एक भाग होतो म्हणून. तो काळ वेगळा होता आणि आजचा काळ वेगळा आहे. आपण चित्रपट पाहिलेला नाही, आपण ना संशोधक, ना तज्ञ, ना या विषयावरील अधिकारी आहोत, त्यामुळे महाकाव्यावर टीका कशी करता येईल, असा सवालही त्यांनी केला. पण हे एक महान महाकाव्य असून ते केवळ भारतीयांसाठीच नव्हे, तर जगभरातील मानवतेसाठी महत्त्वाचे आहे, असे ते म्हणाले.
गाण्यांमध्ये मिथिला-अयोध्येची रंगत हवी होती
पुढे बोलताना सुनील लहरी म्हणाले की, आपली संस्कृती, मूल्ये, भावना आणि श्रद्धा या महाकाव्यातच रुजलेली आहेत आणि या वारशाची काळजी सर्वांनी घेतली पाहिजे. नितेश तिवारी हे उत्तम दिग्दर्शक असून त्यांनी यापूर्वी उत्कृष्ट चित्रपट बनवले आहेत. या चित्रपटाशी संबंधित सर्व कलाकार अत्यंत प्रतिभावान असून त्यांनी मिळून खूप मेहनत घेतली आहे आणि एक चांगला चित्रपट बनवला आहे, असा विश्वास त्यांनी व्यक्त केला.
मात्र, रामायणमधील गाणी आणि संगीताबद्दल त्यांनी काहीशी निराशाही व्यक्त केली. महाकाव्यात संगीताची भूमिका खूप महत्त्वाची असून एका प्रकारे तो त्याचा कणा आहे, असे ते म्हणाले. चित्रपटासाठी ऐकलेल्या संगीतातील काही गाण्यांमधील काही आवाजांनी आपल्याला थोडे निराश केले. या गाण्यांमागील संगीतात मिथिला किंवा अयोध्या येथील स्थानिक रंगत प्रतिबिंबित व्हायला हवी होती. आपण या विषयातील तज्ञ नसलो तरी एक चांगला श्रोता म्हणून ही आपली मते आहेत, असे त्यांनी स्पष्ट केले.
स्रोत: मूळ बातमी
Leave a Reply