सातारा जिल्हा बँक निवडणूक: गोरे यांची मित्रपक्षांवर नाराजी

सातारा जिल्हा मध्यवर्ती सहकारी बँकेच्या निकालानंतर काही वेळातच महायुतीतील कुरबुर समोर आली आहे. भाजप नेते आणि मंत्री जयकुमार गोरे यांनी मित्रपक्षांवर थेट नाराजी व्यक्त केली आहे. महायुतीच्या माध्यमातून लढताना भाजपने जागावाटपाचा निर्णय प्रामाणिकपणे अंमलात आणला, मात्र मित्रपक्षांकडून त्याच पद्धतीने युतीधर्म पाळला गेला नाही, असा आरोप त्यांनी केला आहे. काही ठिकाणी मित्रपक्षांनीच भाजपच्या उमेदवारांना अडचणीत आणल्याने विजयाच्या संधी हुकल्या, असेही ते म्हणाले. भाजपने स्वतंत्रपणे निवडणूक लढवली असती तर जिल्हा बँकेच्या सर्व जागांवर पक्षाचा झेंडा फडकला असता, अशी प्रतिक्रियाही गोरे यांनी दिली.

जागावाटपाचा निर्णय कसा झाला?

जिल्हा बँकेची निवडणूक महायुतीच्या माध्यमातून लढवण्याचा निर्णय मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या सूचनेनुसार झाला होता. त्यांच्या निर्णयाचा आदर करून भाजपने जागावाटप स्वीकारले. ज्या मतदारसंघात मित्रपक्षाचा उमेदवार होता, तिथे त्याच्या विजयासाठी भाजपने ताकद लावली. मात्र काही ठिकाणी मित्रपक्षांकडून अपेक्षित सहकार्य मिळाले नाही, असा थेट आरोप गोरे यांनी केला. माणमध्ये राष्ट्रवादीच्या उमेदवाराला ११६ मते, खटावमध्ये १४४ तर भाजपला ११२ मते मिळाली. पाटणमध्ये महायुतीच्या उमेदवाराला १०४ तर अपक्ष उमेदवाराला ९९ मते मिळाली. फलटणमध्ये रणजितसिंह नाईक-निंबाळकर यांनी चांगले मतदान घेतले, मात्र समशेरसिंह नाईक-निंबाळकर यांना अवघ्या पाच मतांनी पराभव स्वीकारावा लागला.

पुढील निवडणुकीसाठी सूचक इशारा

पदवीधर निवडणुकीप्रमाणे जिल्हा बँकेच्या निवडणुकीतही काही ठिकाणी निकालावर परिणाम घडवण्याचा प्रयत्न झाल्याचा आरोप गोरे यांनी केला. या निवडणुकीतून भाजपला अनेक राजकीय धडे मिळाले आहेत. पुढील जिल्हा परिषद निवडणुकीत पक्ष अधिक आक्रमक आणि ठाम भूमिका घेईल, असे सांगत त्यांनी मित्रपक्षांसह विरोधकांना सूचक इशारा दिला. शब्दाला जागणे ही आपली भूमिका आहे, मात्र युतीतील सर्वांनीच ती भूमिका घेतली नाही, अशी नाराजीही त्यांनी व्यक्त केली.

दरम्यान, निवडणूक संपली असल्याने मतभेद बाजूला ठेवून बँकेच्या हिताला प्राधान्य दिले पाहिजे, अशी भूमिकाही गोरे यांनी स्पष्ट केली. सार्वत्रिक निवडणुकीतील राजकीय संघर्ष बँकेच्या कामकाजात आणू नये, असे ते म्हणाले. बँकेच्या अध्यक्षपदाचा अंतिम निर्णय मुख्यमंत्री देवेंद्र फडणवीस घेतील आणि पक्षाचे व महायुतीचे वरिष्ठ नेतृत्व जो निर्णय घेईल तो सर्वांना मान्य असेल, असे सांगत त्यांनी अध्यक्षपदाचा चेंडू मुख्यमंत्र्यांच्या कोर्टात टोलवला. आता राष्ट्रवादी काँग्रेस आणि शिवसेना नेते गोरेंच्या वक्तव्यावर काय प्रत्युत्तर देतात, हे पाहावे लागेल.

स्रोत: मूळ बातमी