मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार पिंपरी-चिंचवड शहराच्या दौऱ्यावर आहेत. या दौऱ्यात पुण्यातील माण-हिंजवडी ते शिवाजीनगर या मेट्रो मार्गिकेचा उद्घाटन समारंभ तसेच पिंपरी-चिंचवड पोलीस आयुक्तालयांतर्गत विविध प्रकल्प आणि कार्यक्रमांचे उद्घाटन पार पडले. त्यानंतर बोलताना एकनाथ शिंदे यांनी अजित पवार यांची आठवण काढली.
आजचा दिवस पिंपरी-चिंचवडसाठी सुवर्ण क्षण
शिंदे म्हणाले की, आजच्या दिवशी पंतप्रधान नरेंद्र मोदी यांच्या हस्ते मेट्रोचे उद्घाटन झाले आणि आता येथे पोलीस मुख्यालयाचे भूमिपूजन होत आहे. आजचा हा दिवस पिंपरी-चिंचवडसाठी सुवर्ण क्षण आहे, असे म्हटले तर वावगे ठरणार नाही. पोलिसांसाठी विविध उपक्रम या ठिकाणी राबवले जात आहेत. पोलीस आयुक्त विनय कुमार चौबे यांचे त्यांनी मनापासून अभिनंदन केले. जुन्या मानाने पिंपरी-चिंचवड खूप बदलत असून बदल ही काळाची गरज आहे, असेही ते म्हणाले.
अजित पवारांच्या २५ वर्षांच्या नेतृत्वाचे कौतुक
यानंतर शिंदे यांनी अजित पवार यांची आठवण काढत सांगितले की, या शहराच्या विकासामध्ये अजित पवारांचा सिंहाचा वाटा आहे. अजित पवार यांनी २५ वर्षे विकासाचे नेतृत्व केले आणि या शहरात विविध उपक्रम आणले. आधी लोक पुण्यात राहतो, असे सांगायचे; आता लोक अभिमानाने सांगतात की, ते पिंपरी-चिंचवडमध्ये राहतात. जसे पुण्यातील लोक ‘पुणे तिथं काय उणे’ असे म्हणतात, तसे ‘पिंपरी-चिंचवड तिथे काही नाही गडबड’ असे म्हणावे लागेल, असे शिंदे म्हणाले.
संकट मोठे असून राज्यात दुष्काळ असल्याचेही शिंदे यांनी नमूद केले. राज्य सरकारसह केंद्र सरकार मदत करणार असून शेतकऱ्यांना देताना हात आखडता घेतला जाणार नाही, असे ते म्हणाले. कायदा व सुव्यवस्था अबाधित राखायची असेल, तर पोलिसांसाठी असलेल्या गोष्टी व्यवस्थित हव्यात आणि पोलिस यंत्रणा हायटेक व्हायला हवी, अशी त्यांची भूमिका आहे. गुन्हेगारांकडे चांगली वाहने असतात; त्यांना पकडण्यासाठी पोलिसांकडेही चांगली वाहने हवीत, असे त्यांनी सांगितले.
पोलिसांसाठी आम्ही जे करतो ते उपकार नाही, तर ते आमचे कर्तव्य आहे, असे शिंदे म्हणाले. एखादी घटना घडली की आपण तेवढेच बघतो, मात्र त्यामागील मेहनत बघत नाही, असे त्यांनी नमूद केले. दुष्काळग्रस्त शेतकऱ्यांना पोलिसांनी पगारातून जी मदत केली, त्यासाठी त्यांना सॅल्युट करायला हवा, असे ते म्हणाले. पोलीस ठाण्यात जाण्यासाठी आधी नागरिक घाबरायचे; आता विश्वासाने जातात. पोलिसांची ही प्रतिमा बदलली असून आता त्यांना पोलीस हे आधार वाटत आहेत, असे म्हणत शिंदे यांनी पोलिसांचे कौतुक केले.
स्रोत: मूळ बातमी
Leave a Reply