सणावारांच्या दिवसांत घराचे अंगण सजवण्यासाठी दारात रांगोळी काढली जाते. रांगोळीशिवाय सण पूर्ण झाल्यासारखे वाटत नाही. भारतीय संस्कृतीत ही परंपरा पूर्वीपासून चालत आली आहे. कोणत्याही शुभ कार्याच्या दिवशी अंगणात किंवा पाटाखाली सुंदर रांगोळी काढली जाते. दिवाळीच्या दिवसांत तर कंदील आणि दिव्यांसोबत रांगोळीचीही खरेदी केली जाते. कमी वेळात काढता येतील अशा काही सोप्या रांगोळी कल्पना येथे दिल्या आहेत.
फुलांची आणि शुभ चिन्हांची रांगोळी
घरात पूजेसाठी आणलेली फुले पूजा झाल्यावर शिल्लक राहतात. ती फेकून देण्याऐवजी त्यांपासून सुंदर रांगोळी काढल्यास अंगण उठावदार दिसते आणि यासाठी फारसा वेळही लागत नाही. दिवाळीच्या दिवसांत माता लक्ष्मी घरात येते, अशी मान्यता आहे. त्यामुळे अंगणात रांगोळी काढावी, असे मानले जाते. मोराची आकृती, कलश, लक्ष्मीची पाऊले, दिवे आणि कमळाची फुले रांगोळीत काढणे अतिशय शुभ मानले जाते.
पारंपरिक ठिपक्यांची आणि कमळाची डिझाइन
पूर्वीच्या काळापासून दिवाळीत अंगणात ठिपक्यांची रांगोळी काढली जाते. ठिपक्यांच्या रांगोळीशिवाय दिवाळी सण साजरा झाल्यासारखे वाटत नाही. दुसरीकडे, सध्या कमळाच्या डिझाइनचा मोठा ट्रेंड सगळीकडे दिसत आहे. ही रांगोळी काढण्यासाठीही फार वेळ लागत नाही. सोशल मीडियासह इतर अनेक ठिकाणी रांगोळीच्या विविध नवनवीन डिझाइन्स उपलब्ध आहेत. लेटेस्ट डिझाइनची रांगोळी काढल्यानंतर अंगण अधिक आकर्षक दिसते.
स्रोत: मूळ बातमी
Leave a Reply