सफाई कर्मचाऱ्यांच्या घरांचा प्रश्न मार्गी लावावा, त्यांना सर्व शासकीय सुट्या द्याव्यात, दिवसातून चारदा हजेरीच्या विषयावर फेरविचार करावा, कर्मचाऱ्यांचे प्रश्न सोडवण्यासाठी समन्वय समिती स्थापन करावी आणि लाड-पागे समितीच्या आधारावर वारसाहक्काच्या जागा आपल्या स्तरावर व अधिकारात भराव्यात, अशा विविध सूचना भारत सरकारच्या राष्ट्रीय सफाई कर्मचारी आयोगाचे सदस्य रवी कलोसे यांनी महापालिकेसह विविध विभागांच्या अधिकाऱ्यांना दिल्या आहेत.
राष्ट्रीय सफाई कर्मचारी आयोगाचे सदस्य कलोसे यांच्या उपस्थितीत मंगळवारी धुळे महापालिकेतील भारतरत्न अटल बिहारी वाजपेयी सभागृहात आढावा बैठक झाली. या बैठकीला मनपा आयुक्त नितीन कापडणीस, अतिरिक्त आयुक्त करुणा डहाळे, जिल्हा शल्यचिकित्सक डॉ. रवींद्र सोनवणे यांच्यासह महापालिका व विविध विभागांचे अधिकारी तसेच सफाई कर्मचारी संघटनांचे पदाधिकारी नागेज कंडारे, विजय पवार व इतर पदाधिकारी उपस्थित होते.
समन्वय समितीवरून मतभेद
बैठकीत महापालिकेच्या सफाई कर्मचाऱ्यांचे प्रश्न सोडवण्यासाठी समन्वय समितीच्या मुद्द्यावर चर्चा झाली. अशी समिती गठीत असून तिची बैठकही झाल्याचे उपायुक्त हेमंत निकम यांनी सांगितले. मात्र, अशी समितीच नसल्याचे कर्मचारी संघटनांच्या प्रतिनिधींनी सांगितले. त्यावर संघटना नोंदणीकृत असो की अनोंदणीकृत, त्यांना सोबत घेत समिती गठीत करावी, अशी सूचना कलोसे यांनी केली. सफाई कर्मचाऱ्यांना आयुष्मान भारत कार्ड वाटप करावे आणि त्यासाठी मनपात शिबिर घ्यावे, अशी सूचनाही त्यांनी केली. कंत्राटी कामगारांच्या विषयावर १५ दिवसांत अहवाल सादर करण्याचे निर्देशही कलोसे यांनी दिले. लाड-पागे समितीनुसार वारसाहक्काच्या जागा आपल्या अधिकारात भरण्याबाबत १५ दिवसांत कार्यवाही करण्याचे निर्देशही त्यांनी संबंधित सर्व विभागांना दिले.
शहरात वाल्मिकी भवन साकारण्याच्या अनुषंगाने विषय प्रस्तावित करावा, अशी सूचनाही कलोसे यांनी दिली. तसेच सफाई कर्मचाऱ्यांच्या घरांचा प्रश्न, ग्रॅच्युईटीचा प्रश्न, व्यापारी संकुलात गाळ्याचे आरक्षण आणि सेवापुस्तक अद्ययावत ठेवणे आदी विविध विषयांवर कार्यवाहीच्या सूचनाही त्यांनी दिल्या. सफाई कर्मचाऱ्यांना त्यांच्या शैक्षणिक योग्यतेनुसार पदोन्नती देण्याच्या विषयावर मनपा प्रशासनाने केलेल्या कार्यवाहीचे कलोसे यांनी कौतुक केले.
हजेरी आणि सुट्यांबाबत सूचना
सफाई कर्मचाऱ्यांची दिवसातून चार वेळा हजेरी घेतली जाते आणि ती अन्यायकारक असल्याचा मुद्दा कर्मचाऱ्यांनी मांडला. त्यावर बायोमॅट्रिक पद्धतीला विरोध नसला तरी दिवसातून चार वेळा हजेरीचा प्रशासनाने फेरविचार करून निर्णय घ्यावा, अशी सूचना कलोसे यांनी केली. तसेच, सफाई कर्मचाऱ्यांना सर्व शासकीय सुट्या द्याव्यात आणि कामाची अपरिहार्यता असेल तर सुटीच्या दिवसाचा त्यांना मोबदला द्यावा, असेही त्यांनी प्रशासनाला सांगितले.
वारसाहक्काने नोकरीच्या मुद्द्यावर कलोसे यांनी शासनाच्या विरोधात काम करू नये असा इशारा देत राष्ट्रीय सफाई कर्मचारी आयोग मानवाधिकार आयोगासोबत काम करणार असल्याने तेथे तक्रार करण्याची भूमिका मांडली. तसेच संबंधित अधिकाऱ्याला उद्देशून कर्मचाऱ्यांशी माणुसकीने वागण्याचे आवाहनही त्यांनी केले.
स्रोत: मूळ बातमी
Leave a Reply