दिवाळीच्या सुट्ट्यांमध्ये रेल्वेने प्रवास करणाऱ्यांची संख्या वाढत असताना विनातिकीट प्रवास रोखण्यासाठी पश्चिम रेल्वेने विशेष मोहीम हाती घेतली आहे. ऑपरेशन दीप या मोहिमेअंतर्गत मुंबई विभागातील स्थानके आणि गाड्यांमध्ये तिकीट तपासणीची व्याप्ती वाढवण्यात आली आहे. ही मोहीम १४ नोव्हेंबरपर्यंत चालणार आहे.
या मोहिमेत विनातिकीट प्रवास करणारे, आरक्षित डब्यांमध्ये अनधिकृतपणे शिरणारे आणि चुकीच्या श्रेणीतून प्रवास करणारे यांच्यावर कारवाई केली जाणार आहे. नियमभंग करणाऱ्यांकडून दंड वसूल केला जाईल. सणासुदीच्या काळात गर्दी वाढल्याने वैध तिकीट असलेल्या प्रवाशांची गैरसोय होऊ नये म्हणून तपासणीचे नियोजन अधिक व्यापक करण्यात आले आहे.
ऑपरेशन दीपचे चार टप्पे
या मोहिमेत शोध, तपासणी, नियमांची अंमलबजावणी आणि दंडवसुली अशा चार टप्प्यांवर भर दिला जात आहे. डी म्हणजे डिटेक्टिव्ह — यात विनातिकीट प्रवाशांचा शोध घेतला जाईल. ई म्हणजे एक्झामिन — यात तिकिटे आणि आवश्यक कागदपत्रे तपासली जातील. दुसरे ई म्हणजे इन्फोर्स — यात रेल्वे नियमांची अंमलबजावणी केली जाईल. तर पी म्हणजे पेनलाइज — या टप्प्यात नियम मोडणाऱ्यांकडून दंड वसूल केला जाईल.
तपासणीच्या विविध पद्धती आणि बॉडी कॅमेरे
केवळ नियमित तपासणीवर अवलंबून न राहता स्थानक तपासणी, सापळा तपासणी, अचानक धाड, फोर्ट्रेस चेक आणि मेगा तिकीट तपासणी मोहिमांचा वापर केला जात आहे. मेल, एक्स्प्रेस आणि विशेष रेल्वेगाड्यांमध्येही ही कारवाई केली जाते. रेल्वे कायद्यातील तरतुदींनुसार विनातिकीट प्रवासासाठी किमान ५०० रुपयांचा दंड आकारला जातो, त्यामुळे प्रवासापूर्वी वैध तिकीट काढावे, असे आवाहन प्रशासनाने केले आहे.
तपासणीदरम्यान होणारे वाद, कर्मचाऱ्यांची सुरक्षा आणि प्रवाशांशी होणारा संवाद अधिक पारदर्शक ठेवण्यासाठी पश्चिम रेल्वेने बॉडी-वॉर्न कॅमेऱ्यांचा प्रयोग सुरू केला आहे. मुंबई सेंट्रल विभागातील तिकीट तपासणी कर्मचाऱ्यांना हे कॅमेरे आणि विशेष काळ्या रंगाची जॅकेट देण्यात आली आहेत. सुरुवातीला १५ बॉडी कॅमेरे आणि ३० जॅकेट उपलब्ध करून देण्यात आली आहेत.
स्रोत: मूळ बातमी
Leave a Reply