मुरासू वादळाचा परिणाम; राज्यात पुढील ४ दिवस तुरळक पाऊस

बंगालच्या उपसागरात तयार झालेल्या मुरासू चक्रीवादळामुळे वातावरणात बदल झाला आहे. या वादळाचा फटका आंध्र प्रदेशच्या किनारपट्टीला बसणार असला, तरी समुद्रातील या चक्राकार वाऱ्यांचा परिणाम महाराष्ट्रावरही जाणवणार आहे. हवामान विभागाने राज्यात पुढील चार दिवस पावसाची शक्यता वर्तवली आहे.

ऐन दिवाळीच्या तोंडावर या अवकाळी पावसामुळे शेतकऱ्यांची चिंता वाढली आहे. या पावसाचा फटका शेतकऱ्यांना बसण्याची शक्यता आहे.

पुढील चार दिवसांचा अंदाज

भारतीय हवामान विभागाच्या पुणे विभागाचे प्रमुख एस. डी. सानप यांनी सांगितले की, सध्या होत असलेल्या पावसामुळे धरणे भरण्याची शक्यता कमी आहे. राज्यात ६ नोव्हेंबरपासून हवामानात बदल होऊन थंडीची चाहूल लागण्यास सुरुवात होईल.

येणाऱ्या चार दिवसांत राज्यात सर्वदूर पाऊस नसेल; काही ठिकाणी तुरळक पाऊस होईल. काल पुणे आणि नाशिक अशा काही ठिकाणीच पावसाने हजेरी लावली. पुणे जिल्ह्यातील बारामती आणि इंदापूर तालुक्यात चांगला पाऊस झाल्याने शेतकऱ्यांना दिलासा मिळाला आहे. राज्यात सर्वीकडे पाऊस होईल, अशी सध्याची परिस्थिती नाही, असा अंदाजही हवामान विभागाने वर्तवला आहे.

५ नोव्हेंबर रोजी राज्यातील अनेक भागांत मेघगर्जना, विजांचा कडकडाट आणि ताशी ३० ते ६० किलोमीटर वेगाने वारे वाहण्याची शक्यता आहे. ४ नोव्हेंबर रोजीही विजांच्या कडकडाटासह वादळी पावसाची शक्यता आहे, तर काही भागांत ४० ते ५० किलोमीटर वेगाने वारे वाहू शकतात. आजही काही भागांत विजांचा कडकडाट आणि वादळी वाऱ्यांसह पावसाचा इशारा देण्यात आला आहे. मराठवाड्यात जोरदार वारे आणि मेघगर्जनेसह पावसाचा जोर अधिक दिसण्याची शक्यता आहे.

थंडीचे आगमन लांबणीवर?

यंदा थंडीचे आगमन लांबणीवर जाण्याची शक्यता आहे. नोव्हेंबरमध्येही उष्णतेपासून दिलासा मिळण्याची शक्यता कमी आहे. प्रशांत महासागरातील एल निनोच्या प्रभावामुळे देशाच्या बहुतांश भागांत कमाल तापमान सरासरीपेक्षा अधिक राहण्याचा अंदाज आहे, त्यामुळे हिवाळ्यातही उष्णतेचा प्रभाव जाणवू शकतो. हवामान विभागाने शनिवारी प्रसिद्ध केलेल्या मासिक अंदाजानुसार गुजरात आणि राजस्थानमध्ये उष्णतेची तीव्रता अधिक राहील, तर महाराष्ट्रातील काही भागांनाही त्याची झळ बसण्याची शक्यता आहे.

स्रोत: मूळ बातमी