Gmail मध्ये महत्त्वाच्या मेलसाठी अलर्ट आणि रिंगटोन सेट करा

दररोज आपल्या इनबॉक्समध्ये शेकडो ईमेल येतात. त्यातील मोठा भाग जाहिराती आणि माहितीपत्रकांचा असतो. या गर्दीत एखादा खरोखर महत्त्वाचा ईमेल नजरेतून सुटण्याची शक्यता मोठी असते. प्रत्येक वेळी इनबॉक्स उघडून पाहणेही शक्य नसते. अशा वेळी Gmail मधील काही सेटिंग्ज उपयोगी पडतात. विशिष्ट पत्त्यावरून येणाऱ्या मेलसाठी वेगळा अलर्ट लावता येतो, जेणेकरून तो मेल येताच त्याची सूचना आणि आवाज मिळतो.

लेबल आणि फिल्टर तयार करा

सुरुवातीला Gmail मध्ये एक लेबल तयार करावे. लेबल पर्यायासमोर असलेल्या अधिक (+) चिन्हावर क्लिक करून नाव देऊन लेबल बनवता येते. त्यानंतर संगणकावर Gmail उघडून शोधपट्टीच्या उजव्या बाजूला असलेल्या फिल्टर पर्यायावर क्लिक करावे. तिथे दिसणाऱ्या From या रकान्यात ज्या पत्त्यावरून येणारे मेल महत्त्वाचे आहेत, तो ईमेल पत्ता लिहावा. पुढे Create filter निवडल्यावर Apply the label आणि Always mark it as important हे दोन पर्याय दिसतात. तयार केलेले लेबल निवडून Always mark it as important हाही पर्याय निवडावा आणि पुन्हा Create filter वर क्लिक करावे. त्यानंतर त्या पत्त्यावरून आलेला कोणताही मेल इनबॉक्ससोबतच तयार केलेल्या लेबलमध्येही दिसेल.

अलर्ट आणि आवाजाची सेटिंग

फिल्टर तयार झाल्यावर अलर्टची सेटिंग करावी. संगणकावर शोधपट्टीजवळील सेटिंग पर्यायावर क्लिक करून See all settings निवडावे. General विभागात खाली सरकल्यावर Desktop notifications हा पर्याय दिसतो. तिथे Important mail notifications on निवडावे. त्याखाली Mail notification sounds या पर्यायातून आवडता आवाज निवडता येतो. त्यानंतर ठरलेल्या पत्त्यावरून ईमेल येताच तो आवाज वाजेल आणि अपेक्षित मेल आल्याचे लगेच कळेल. मात्र स्वतःची वेगळी रिंगटोन निवडण्याचा पर्याय Gmail च्या सर्व डेस्कटॉप आवृत्त्यांमध्ये उपलब्ध असेलच असे नाही, हेही लक्षात ठेवावे.

स्रोत: मूळ बातमी