बॉलिवूडचा किंग खान म्हणजेच शाहरुख खानचा वाढदिवस चाहत्यांसाठी एखाद्या सणापेक्षा कमी नसतो. दरवर्षी २ नोव्हेंबरला त्याच्या मुंबईतील मन्नत बंगल्याबाहेर चाहत्यांची प्रचंड गर्दी जमते. यंदा मात्र वाढदिवसाच्या आधीच त्याच्या घराबाहेर मोठी तयारी सुरू झाल्याचे पाहायला मिळत आहे. शाहरुख खान २ नोव्हेंबर २०२६ रोजी आपला ६१ वा वाढदिवस साजरा करणार आहे.
या वाढदिवसानिमित्त मन्नत बंगल्याबाहेर मोठी स्क्रीन लावण्याची तयारी करण्यात आली आहे. हा बंगला सुमारे २०० कोटी रुपयांचा असल्याचे बोलले जाते. या मोठ्या स्क्रीनवर किंग चित्रपटाशी संबंधित काही खास झलक दाखवली जाणार असल्याची चर्चा आहे.
मध्यरात्री नेमके काय येणार?
किंगचे दिग्दर्शक सिद्धार्थ आनंद यांनी सोशल मीडियावर सलग तीन दिवस मध्यरात्री पोस्ट केल्या. या पोस्टमधील शब्द एकत्र केल्यावर इट्स टाईम फॉर द वर्ल्ड टू सेलिब्रेट असा संदेश तयार झाला. त्यामुळे शाहरुखच्या वाढदिवशी चित्रपटाचा टिझर किंवा गाणे प्रदर्शित होणार का, याबाबत चाहत्यांमध्ये चर्चा सुरू झाली आहे. वृत्तानुसार, २ नोव्हेंबरला किंग चित्रपटातील पहिले गाणे प्रदर्शित होणार असून त्याला अरिजित सिंहने आवाज दिला आहे. शाहरुखनेही याआधी चाहत्यांशी संवाद साधताना अरिजित गाण्यावर काम करत असल्याचे सांगितले होते. एड शीरन आणि अरिजित सिंह एकत्र गाणे गाणार असल्याचीही चर्चा आहे, मात्र अद्याप अधिकृत घोषणा झालेली नाही.
मुंबईत फक्त शाहरुखची हवा
शाहरुखच्या वाढदिवसाचा उत्साह केवळ मन्नतपुरता मर्यादित राहिलेला नाही. वांद्रे-वरळी सी लिंकवरही त्याच्या सन्मानार्थ रोषणाई करण्यात आली असून त्याचे फोटो आणि व्हिडिओ सोशल मीडियावर व्हायरल होत आहेत. सिद्धार्थ आनंद दिग्दर्शित किंग हा अॅक्शन थ्रिलर चित्रपट असून त्यात शाहरुखसोबत त्याची मुलगी सुहाना खान, दीपिका पदुकोण, अभिषेक बच्चन, अनिल कपूर, राणी मुखर्जी, जयदीप अहलावत आणि राघव जुयल यांसारखे कलाकार झळकणार आहेत. हा चित्रपट २४ डिसेंबर २०२६ रोजी चित्रपटगृहांमध्ये प्रदर्शित होणार आहे.
स्रोत: मूळ बातमी
Leave a Reply