जळगाव शालार्थ घोटाळा: दहा संस्थांकडून माहितीला टाळाटाळ

जळगाव जिल्ह्यात बोगस शालार्थ आयडी प्रकरणात वैयक्तिक मान्यता बनावट असल्याचे उघड झाल्यानंतर माध्यमिक शिक्षण विभागाने मोठी कारवाई केली आहे. जिल्ह्यातील ६५० मान्यतांपैकी ५३० शिक्षकांच्या बोगस मान्यता रद्द करण्याचे आदेश काढण्यात आले आहेत. त्यापैकी साडेचारशेच्या जवळपास मान्यता रद्द करण्याचे आदेश वितरितही झाले आहेत. तरीही या प्रकरणातील दहा शाळांची कागदपत्रे विशेष तपास पथकाला अद्याप प्राप्त झालेली नाहीत, त्यामुळे माहिती देण्यासाठी पाच तालुक्यांतील गटशिक्षणाधिकाऱ्यांना माध्यमिक शिक्षणाधिकारी कल्पना चव्हाण यांनी पत्र पाठवले आहे.

विशेष तपास पथकाची तपासणी सुरू

शालार्थ आयडी घोटाळा राज्यभरात चर्चेत असून त्याची सर्वांत जास्त व्याप्ती जळगाव जिल्ह्यात असल्याचे सांगितले जाते. या प्रकरणात आतापर्यंत जिल्ह्यातील पाच जणांना अटक झाली आहे, तर विशेष तपास पथकाकडून संस्थांमध्ये तपासणी सुरू आहे. असे असतानाही काही संस्थांकडून माहिती देण्यास टाळाटाळ होत असल्याचे समोर आले आहे. त्यात अमळनेर तालुक्यातील चार शाळांचा समावेश आहे. प्रभारी शिक्षण उपसंचालक एम. यु. देवकर आणि विशेष तपास पथकाचे सहआयुक्त संदीप मिटके यांनी याबाबत माध्यमिक शिक्षणाधिकाऱ्यांशी पत्रव्यवहार केला आहे.

२०१० ते २०२५ या काळातील अहवाल मागवले

संबंधित दहा शाळांची २०१० ते २०२५ या कालावधीतील तपासणी आणि तपासणी पूर्तता अहवाल सादर करण्यास सांगण्यात आले आहे. शिक्षण उपसंचालक कार्यालय नाशिक, शिक्षणाधिकारी, वेतन अधीक्षक, गटशिक्षणाधिकारी आणि शिक्षण विस्तार अधिकारी यांच्याकडून झालेल्या तपासणीचे अहवाल यात अपेक्षित आहेत. ही माहिती अनेक वेळा मागवूनही दिली गेली नसल्याचे विशेष पथकाने पत्रात म्हटले आहे. अमळनेर, एरंडोल, चाळीसगाव, जळगाव आणि मुक्ताईनगर या पाच तालुक्यांतील शाळांची कागदपत्रे नसल्याने त्यांची तपासणी अद्याप झालेली नाही. त्यामुळे डी. आर. कन्याशाळा अमळनेर, शिवाजी हायस्कूल अमळनेर, जिजाऊ माध्यमिक विद्यालय भिलाली, प्रियदर्शनी विद्यालय एरंडोल, भारती माध्यमिक विद्यामंदिर कासोदा, सरस्वती माध्यमिक विद्यालय पाडसे, बेलगंगा तांत्रिक माध्यमिक विद्यालय, नूतन मराठा विद्यालय जळगाव, कै. अशोक फडके माध्यमिक व उच्च माध्यमिक विद्यालय कुऱ्हा काकोडा, मिठाराम फकिरा तराळ विद्यालय अंतुर्ली आणि सर्वोदय विद्यालय सिंधगव्हाण या शाळांची माहिती सादर करण्यासाठी पाच तालुक्यांतील गटशिक्षणाधिकाऱ्यांना नोटीसा बजावण्यात आल्या आहेत.

स्रोत: मूळ बातमी