धुळ्यात निबंध स्पर्धेत विद्यार्थ्यांचा उत्स्फूर्त सहभाग

भारतरत्न डॉ. ए. पी. जे. अब्दुल कलाम यांच्या जयंतीनिमित्त साजरा होणाऱ्या वाचन प्रेरणा दिनाचे औचित्य साधून धुळ्यातील राजवाडे संशोधन मंडळाच्या ग्रंथालयाने निबंध स्पर्धेचे आयोजन केले होते. शहरातील विविध शाळांमधून सुमारे २०० निबंध या स्पर्धेसाठी प्राप्त झाले. विद्यार्थ्यांनी कल्पकता आणि अभ्यासपूर्ण मांडणीच्या जोरावर परीक्षकांची मने जिंकली. स्पर्धेतील विजेत्यांना बक्षिसे देण्याचा कार्यक्रम मान्यवरांच्या हस्ते पार पडला.

बक्षीस वितरण समारंभात मान्यवरांची उपस्थिती

मंडळाच्या वस्तुसंग्रहालय दालनात हा बक्षीस वितरण समारंभ झाला. मंडळाचे कार्याध्यक्ष संजय मुंदडा अध्यक्षस्थानी होते. संशोधन अधिकारी मृदुला वर्मा आणि संशोधक संपादक प्राचार्य डॉ. अनिल बैसाणे या वेळी उपस्थित होते. परीक्षक म्हणून काम पाहणाऱ्या श्रीमती वर्मा यांनी सहभागी शाळा, विद्यार्थी आणि शिक्षकांचे कौतुक केले. उर्दू माध्यमाच्या विद्यार्थ्यांनी स्वतःच्या हस्ताक्षरात लिहिलेल्या निबंधांचे त्यांनी विशेष कौतुक केले. आजच्या डिजिटल युगात विद्यार्थ्यांनी स्वतःच्या भाषेत प्रभावी आणि मुद्देसूद लेखन करणे ही समाधानाची बाब असल्याचे त्यांनी नमूद केले.

प्राचार्य डॉ. बैसाणे यांनी स्मार्टफोनच्या वाढत्या वापरामुळे वाचनसंस्कृतीवर होणाऱ्या परिणामाबद्दल खंत व्यक्त केली. पुस्तक हा विद्यार्थ्यांचा खरा मित्र असून त्यातूनच ज्ञान आणि विचारांची समृद्धी घडते, असे ते म्हणाले. सर्वांनी ‘वाचाल तर वाचाल’ हा संदेश अंगीकारावा, असे आवाहन त्यांनी केले. कार्याध्यक्ष मुंदडा यांनी मंडळ शताब्दी वर्षाच्या दिशेने वाटचाल करत असल्याचे सांगितले. नव्या पिढीत वाचनाची आवड, संशोधनाची जिज्ञासा आणि इतिहासाचा अभिमान निर्माण होणे गरजेचे असल्याचे त्यांनी नमूद केले. विद्यार्थ्यांनी पालक आणि मित्रांसह या ऐतिहासिक ठेव्याला तसेच वस्तुसंग्रहालयाला अवश्य भेट द्यावी, असे आवाहन त्यांनी केले.

विजेते विद्यार्थी आणि कार्यक्रमाचे संयोजन

प्रथम क्रमांक रिद्धी संदीप पाटील (जय हिंद हायस्कूल), द्वितीय क्रमांक पद्मिनी भूषण पवार (जिजामाता कन्या विद्यालय) आणि तृतीय क्रमांक सुफियान रसौद्दीन शेख (एल. एम. सरदार उर्दू हायस्कूल) यांनी पटकावला. उत्तेजनार्थ बक्षिसे आरुषी सुंजे, तनिष करंके, गौरी गवळे, आफिया अंजुम शेख अरमान, दिव्यानी बोरसे, जिग्नेश माळी, मंजिरी सोनवणे आणि वर्षा गांगुर्डे यांना देण्यात आली. मान्यवरांच्या हस्ते या सर्व विद्यार्थ्यांना पारितोषिके देण्यात आली. ग्रंथालय सचिव जयश्री शहा यांनी प्रास्ताविक केले. कार्यक्रमात डॉ. कलाम यांना अभिवादन करण्यात आले. ग्रंथालय लिपिक रेणुका शिंदे यांनी सूत्रसंचालन केले, तर भूषण बर्गे यांनी आभार मानले. ग्रंथालयाच्या कर्मचाऱ्यांनी कार्यक्रम यशस्वी करण्यासाठी परिश्रम घेतले.

स्रोत: मूळ बातमी