धाराशिव : जिल्ह्याच्या रेशनिंग व्यवस्थेत विविध तांत्रिक आणि पात्रताविषयक त्रुटी आढळून आल्याने तब्बल ६७ हजार ८९९ रेशन कार्डधारकांना मिळणारे सवलतीचे धान्य तात्पुरते थांबवण्यात आले आहे. आधार स्थिती, मर्यादेपेक्षा जास्त उत्पन्न आणि दुबार लाभार्थी ही त्यामागील प्रमुख कारणे आहेत. दुष्काळी स्थितीत धान्य वितरण थांबल्यामुळे हजारो लाभार्थी कुटुंबांपुढे अडचण उभी राहिली आहे.
तालुकानिहाय आकडेवारी
जिल्हा प्रशासनाकडून मिळालेल्या अधिकृत माहितीनुसार, धान्य वितरण थांबवलेल्या लाभार्थ्यांची तालुकानिहाय संख्या अशी आहे : धाराशिव १८,१४३, तुळजापूर ८,५९६, लोहारा ८,४०९, कळंब ७,७२९, वाशी ७,३६४, उमरगा ७,०३९, भूम ५,३९३ आणि परंडा ५,२२६.
त्रुटींची प्रमुख कारणे
जिल्ह्यात २७ हजार ७६१ लाभार्थी दुबार असल्याचे निष्पन्न झाले आहे. निकषांपेक्षा जास्त उत्पन्न असलेले किंवा अयोग्य ठरलेले २६ हजार ४०७ लाभार्थी यात अडकले आहेत. याशिवाय सायलेंट लाभार्थी ६ हजार ३८४, शासकीय वा निमशासकीय क्षेत्रात संचालक असलेले ३ हजार १९० व्यक्ती, शंभर वर्षांपेक्षा वयोवृद्ध असलेले १ हजार ४२ सभासद, ग्रॉस टर्नओव्हरशी संबंधित १ हजार ५६७, आधार स्थितीतील त्रुटी असलेले १ हजार १०८ आणि वाहन मालकीमुळे ३४५ लाभार्थ्यांचे धान्य थांबवण्यात आले आहे.
नागरिकांची व्यथा आणि पडताळणी
अनेक कुटुंबांतील सदस्यांनी बँकांकडून शैक्षणिक किंवा इतर कर्जे मिळवण्यासाठी नाममात्र आयकर विभागात नोंदणी केली होती. ही नोंदणी उत्पन्न वाढल्याचे लक्षण नसून कर्ज मिळवण्यासाठी केलेली प्रक्रिया आहे, असे धान्यापासून वंचित राहिलेल्या कार्डधारकांचे म्हणणे आहे. केवळ या कारणावरून सवलतीचे रेशन बंद करणे अन्यायकारक असल्याची त्यांची भावना आहे. मोबाइल क्रमांक आधार कार्डशी जोडलेला नसल्याने ई-केवायसी अपूर्ण असलेल्यांनाही धान्यापासून वंचित राहावे लागत आहे. धान्य पुरवठा बंद केलेल्यांची यादी पोर्टलवरूनच आलेली आहे. उत्पन्न कमी असूनही धान्य मिळत नसेल आणि निकषांत बसत असाल, तर तहसील कार्यालयात अर्ज करावा, असे परंड्याचे तहसीलदार नीलेश काकडे यांनी सांगितले. पोर्टलवरील यादीची पडताळणी सुरू असून छाननीनंतर पात्र ठरणाऱ्या प्रत्येक लाभार्थ्याला नियमित धान्य दिले जाईल, अशी ग्वाही पुरवठा विभागातील अधिकाऱ्यांनी दिली आहे.
स्रोत: मूळ बातमी
Leave a Reply