सिंधुदुर्गनगरी येथे फार्मर आयडी नोंदणी न झाल्याने अनेक शेतकरी पुण्यश्लोक अहिल्यादेवी होळकर शेतकरी कर्जमुक्ती योजनेच्या लाभापासून वंचित राहिले आहेत. यात शेतकरी महिला, शेती करणाऱ्या शेतकऱ्यांचे वारस आणि देवस्थान जमिनी कसणारे शेतकरी यांचा समावेश आहे.
आतापर्यंत जिल्ह्यातील २ हजार ७५८ शेतकऱ्यांच्या खात्यात कर्जमुक्तीचे १४.४० कोटी रुपये जमा झाले आहेत. तरीही विविध कारणांमुळे १ हजार ५५६ शेतकऱ्यांची ई-केवायसी प्रलंबित असून १ हजार ६२ शेतकऱ्यांकडे फार्मर आयडीच नाही, ही स्थिती समोर आली आहे.
पात्रता आणि वितरणाची आकडेवारी
कर्जमुक्ती योजनेच्या पोर्टलवर अपलोड केलेल्या ६ हजार ३७० पैकी ५ हजार ३९७ शेतकऱ्यांची यादी आधार प्रमाणीकरणासाठी पात्र ठरली होती. यामध्ये विकास आणि जिल्हा मध्यवर्ती बँकेकडील ३ हजार ४७४ कर्जदार शेतकरी, तर राष्ट्रीयकृत व ग्रामीण बँकेकडील १ हजार ९२३ शेतकऱ्यांचा समावेश होता.
जिल्हा उपनिबंधक सहकारी संस्था कार्यालयाकडून उपलब्ध झालेल्या आकडेवारीनुसार विकास व जिल्हा बँकेच्या २ हजार १२७ शेतकऱ्यांच्या कर्जखात्यांत ८ कोटी ८४ लाख ७९ हजार ९०४ रुपये जमा झाले आहेत. राष्ट्रीयीकृत व ग्रामीण बँकांच्या ६३१ शेतकऱ्यांना ५ कोटी ५६ लाख १३ हजार ८५९ रुपयांचा लाभ मिळाला आहे.
कर्जमुक्तीची रक्कम टप्प्याटप्प्याने देण्यात आली. ७ ऑगस्टला १ हजार ५६९ शेतकऱ्यांच्या खात्यांत ७ कोटी ७७ लाख ९८ हजार ७४४ रुपये, २४ ऑगस्टला ९२९ शेतकऱ्यांना ५ कोटी ५० लाख ७१ हजार १२८ रुपये, तर १ ऑक्टोबरला आणखी २६० शेतकऱ्यांच्या कर्जखात्यांत १ कोटी १२ लाख २३ हजार ८९१ रुपये जमा झाले.
फार्मर आयडीअभावी अडचण काय आहे
१ हजार ६२ शेतकऱ्यांचा प्रश्न क्लिष्ट आहे. सातबारावर नाव समाविष्ट नसल्याने या शेतकऱ्यांची फार्मर आयडी नोंदणी होत नाही. यामध्ये महिला शेतकरी, कुटुंब प्रमुखाच्या संमतिपत्राच्या आधारे बँकेकडून कर्ज घेऊन शेती करणारे शेतकऱ्यांचे वारस, तसेच देवस्थान इनाम आणि कबुलायतदार गावकर जमीन कसणारे शेतकरी यांची संख्या अधिक आहे. तोंडी कराराने शेती करणारे लहान शेतकरीही यात आहेत.
सिंधुदुर्ग जिल्हा मध्यवर्ती सहकारी बँकेच्या अध्यक्षा मनीषा दळवी यांनी दिलेल्या माहितीनुसार, पालकमंत्री नीतेश राणे यांच्या माध्यमातून महसूलमंत्री चंद्रशेखर बावनकुळे यांची भेट घेण्यात आली होती. त्यांच्याकडे फार्मर आयडी सक्तीचा न करण्याची विनंती करण्यात आली आहे.
लोरे, ता. वैभववाडी येथील शेतकरी रामा धोंडू गवाणकर यांनी सांगितले की, कर्जमुक्ती यादीत त्यांचा समावेश आहे आणि रक्कम ३० हजार ४७० रुपये आहे. आधार लिंक केले असूनही ते अद्याप कर्जमुक्त झालेले नाहीत.
स्रोत: मूळ बातमी
Leave a Reply