मुदत संपलेले, खराब झालेले किंवा ग्राहकांकडून परत आलेले अन्नपदार्थ प्रत्यक्षात नष्ट न करता केवळ कागदांवर त्यांची विल्हेवाट लावल्याचे दाखवले जात असल्याचा धक्कादायक प्रकार उघडकीस आला आहे. असा माल काही मध्यस्थांच्या मदतीने पुन्हा बाजारपेठेत आणला जातो, त्याचे नव्याने पॅकिंग केले जाते आणि तो नागरिकांना विकला जातो. काही ठिकाणी उत्पादनाच्या तारखांमध्येही बदल केल्याचे निदर्शनास आले आहे. या पार्श्वभूमीवर अन्न व औषध प्रशासनाने राज्यासाठी स्वतंत्र अनुपालन आदेश जारी केला आहे. प्रशासनाचे आयुक्त तुकाराम मुंढे यांनी पत्रकार परिषदेत या आदेशाची माहिती दिली.
माल नष्ट केल्याचा पुरावा देणे आता बंधनकारक
नव्या आदेशानुसार मुदत संपलेला, खराब झालेला आणि परत आलेला माल योग्य पद्धतीने नष्ट केल्याचा पुरावा संबंधित कंपनीला द्यावा लागणार आहे. असा माल चांगल्या अन्नपदार्थांपासून वेगळा ठेवणेही आवश्यक करण्यात आले आहे. तसेच महाराष्ट्र प्रदूषण नियंत्रण मंडळाकडे नोंद असलेल्या विल्हेवाट लावणाऱ्या कंपन्यांकडून नष्ट केल्याचे प्रमाणपत्र घेण्याची तरतूद आदेशात आहे. कंपनी छोटी असो किंवा मोठी, कालबाह्य अन्नाची एकही पिशवी पुन्हा बाजारात येणार नाही, याची खबरदारी घेण्याचे निर्देश देण्यात आले आहेत.
दहा कारवायांमध्ये पाच कोटींचा साठा जप्त
गेल्या काही दिवसांपासून अशा प्रकारांविरोधात प्रशासनाकडून कारवाई सुरू आहे. भिवंडीतील गुलजार नगर परिसरात सुरुवातीला ८० हजार रुपयांचा साठा जप्त करण्यात आला, त्यानंतर २६ लाख रुपयांचाही साठा जप्त झाला. वडपे परिसरात दोन ठिकाणी कारवाई करून साठा जप्त करण्यात आला आणि संबंधित परवाना निलंबित करण्यात आला. अंबरनाथ आणि पडघा येथेही कारवाई झाली आहे. आतापर्यंत दहा कारवायांमध्ये एकूण पाच कोटी रुपयांचा साठा जप्त करण्यात आला असून दोन गुन्हे दाखल झाले आहेत. या प्रकरणांमध्ये एकूण ३२ जणांचा आरोपी म्हणून समावेश आहे.
कारवाई हाच अंतिम उद्देश नसल्याचे मुंढे यांनी स्पष्ट केले. कारवाया वाढल्यामुळे काय फरक पडला, असा प्रश्न विचारला जातो, मात्र कारवाई हे केवळ एक माध्यम असल्याचे त्यांनी सांगितले. अन्न व्यवसायातील प्रत्येक घटकाची जबाबदारी निश्चित करून नियमांचे पालन करणारी यंत्रणा उभी करण्याचे काम सुरू आहे. आतापर्यंत विविध क्षेत्रांसाठी २२ अनुपालन आदेश काढण्यात आले आहेत. हॉटेल, दूध आणि दुग्धजन्य पदार्थ, खाद्यतेल आणि शालेय पोषण आहार अशा विविध क्षेत्रांसाठी कोणते नियम पाळणे आवश्यक आहे, हे या आदेशांमधून स्पष्ट करण्यात आले आहे.
स्रोत: मूळ बातमी
Leave a Reply