गुजरातमधील बनासकांठा जिल्ह्यातील भिलडी येथे पंतप्रधान नरेंद्र मोदी यांनी आपल्या आयुष्याच्या शेवटच्या श्वासापर्यंत देशातील जनतेची सेवा करत राहण्याची ग्वाही दिली. भारत गोवंश प्रजनन आणि संशोधन केंद्राचे उद्घाटन केल्यानंतर आयोजित सभेत ते बोलत होते. यावेळी त्यांनी सुमारे १४ हजार कोटी रुपयांच्या विविध विकासकामांचे लोकार्पण आणि भूमिपूजन केले, तसेच पंतप्रधान किसान सन्मान निधी योजनेचा २४ वा हप्ताही वितरित केला.
देशासमोर संकट उभे असताना विरोधकांना आनंद होत असल्याचा आरोप पंतप्रधानांनी केला. खते आणि स्वयंपाकाच्या गॅसच्या उपलब्धतेबाबत अफवा पसरवून जनतेमध्ये भीती निर्माण केली जात असल्याचे त्यांनी म्हटले. शेतकरी, तरुण आणि महिला विकसित भारताच्या उभारणीसाठी प्रयत्न करत असताना देशाची प्रगती काही लोकांना सहन होत नाही, अशी टीकाही त्यांनी केली.
खतांच्या किमतींवरून विरोधकांवर टीका
पश्चिम आशियातील संघर्षाच्या पार्श्वभूमीवर देश खत आणि इंधनाच्या उपलब्धतेबाबत आवश्यक उपाययोजना करत असताना विरोधकांकडून जाणीवपूर्वक अफवा पसरवल्या जात असल्याचा आरोप मोदी यांनी केला. खतांचा तुटवडा निर्माण होणार असल्याचे सांगून शेतकऱ्यांमध्ये भीती आणि गोंधळाचे वातावरण तयार करण्यात आले, असे त्यांनी म्हटले. जागतिक बाजारपेठेत खतांच्या किमती वाढल्या असल्या तरी त्याचा अतिरिक्त भार सरकारने शेतकऱ्यांवर पडू दिला नाही, असेही त्यांनी सांगितले. जागतिक बाजारात युरियाच्या एका गोणीची किंमत तीन हजार रुपयांपर्यंत असताना भारतीय शेतकऱ्यांना ती ३०० रुपयांपेक्षा कमी दरात मिळत आहे. डीएपी खताची जागतिक किंमत पाच हजार रुपयांवर गेली असताना शेतकऱ्यांना ते एक हजार ३५० रुपयांना उपलब्ध करून दिले जात असल्याचे त्यांनी नमूद केले.
किसान सन्मानच्या हप्त्याचे वितरण
गेल्या काही वर्षांत विविध सरकारी योजनांच्या माध्यमातून शेतकऱ्यांना ५० लाख कोटी रुपयांहून अधिक लाभ मिळाला किंवा त्यांची बचत झाली असल्याचा दावा पंतप्रधानांनी केला. किसान सन्मान निधीच्या २४ व्या हप्त्यापोटी सुमारे १० कोटी शेतकऱ्यांच्या खात्यांत १८ हजार कोटी रुपयांहून अधिक रक्कम जमा करण्यात आली. या योजनेच्या प्रारंभापासून आतापर्यंत छोट्या शेतकऱ्यांना सुमारे साडेचार लाख कोटी रुपये थेट देण्यात आले आहेत, असेही त्यांनी सांगितले.
स्रोत: मूळ बातमी
Leave a Reply