धुळे शहरात भारतीय जनता पक्षातर्फे शुक्रवारी ‘लोकतंत्र बचाओ, अराजकता हटाओ’ पदयात्रा काढण्यात आली. शहर आमदार अनुप अग्रवाल यांच्या जनसंपर्क कार्यालयापासून ते जमनालाल बजाज रोडपर्यंत ही पदयात्रा निघाली. यामध्ये जिल्ह्याचे पालकमंत्री जयकुमार रावल, माजी केंद्रीय संरक्षण राज्यमंत्री डॉ. सुभाष भामरे, आमदार अनुप अग्रवाल, आमदार राम भदाणे, महापौर मायादेवी परदेशी यांच्यासह अनेक पदाधिकारी सहभागी झाले होते.
पालकमंत्र्यांनी काय म्हटले?
निवडणूक आयोगाच्या सखोल मतदार पुनरीक्षण मोहिमेच्या आडून विरोधी पक्ष आणि परकीय शक्ती घटनात्मक संस्थांवर हल्ले करत आहेत, असा आरोप पालकमंत्री रावल यांनी पत्रकार परिषदेसह एका सभेत केला. या माध्यमातून देशात अराजकता माजविण्याचा प्रयत्न होत असून, विरोधी पक्षांचे मनसुबे जनता कधीही यशस्वी होऊ देणार नाही, असे ते म्हणाले. देशातील विघातक शक्तींना उलथवून टाकू, असा इशाराही त्यांनी दिला.
एसआयआरवरून आरोप-प्रत्यारोप
निवडणूक आयोगाने देशात आतापर्यंत १२ वेळा विशेष मतदार पुनरीक्षण मोहीम राबवली असून, त्यापैकी १० वेळा काँग्रेस सत्तेत असताना ही प्रक्रिया झाली, असे रावल यांनी सांगितले. निवडणूक आयोग ही स्वायत्त संस्था असून तिचा सरकारशी थेट संबंध नसतो, असेही ते म्हणाले. पराभव पचवता येत नसल्याने विरोधक निवडणूक आयोग आणि सर्वोच्च न्यायालयासारख्या संस्थांना कमकुवत करण्याचा प्रयत्न करत आहेत, असा आरोप त्यांनी केला. विरोधक स्वतःच्या पराभवाचे खापर घटनात्मक संस्थांवर फोडून लोकशाही कमकुवत करत आहेत, असे सांगत देशवासीयांनी या अराजकतेविरुद्ध एकजुटीने लढावे, असे आवाहन त्यांनी केले.
स्रोत: मूळ बातमी
Leave a Reply