सोशल मीडियावर सध्या एक पोस्ट तुफान व्हायरल होत आहे. महिला व बालविकास विभागांतर्गत ‘ब्युटी पार्लर किट सहाय्य योजना’ सुरू झाल्याचा दावा या पोस्टमध्ये केला जात आहे. लाडकी बहीण योजनेनंतर आता महिलांच्या फायद्यासाठी ही नवी योजना आल्याची चर्चा महिलांमध्ये सुरू झाली होती.
व्हायरल पोस्टमध्ये काय दावा केला जात होता?
व्हायरल झालेल्या पोस्टनुसार, या योजनेअंतर्गत 18 ते 45 वयोगटातील सर्व पात्र महिलांना मदत मिळणार असल्याचे सांगितले जात होते. राज्यभरातील 18 वर्षांच्या तरुणींपासून ते 45 वर्षांच्या महिलांपर्यंत सर्वांना ब्युटी पार्लर किटचे वाटप केले जाईल, असा दावा केला जात होता. ही पोस्ट पाहिल्यानंतर अनेकांना आनंद झाला आणि ती पुढे इतरांना शेअर केली जात होती.
सरकारचे स्पष्टीकरण काय?
मात्र या योजनेबाबत व्हायरल होणारा मेसेज खोटा असल्याचे स्पष्ट झाले आहे. महाराष्ट्र सरकारने अशी कोणतीही योजना सुरू केलेली नाही, असे स्पष्टीकरण देण्यात आले आहे. सोशल मीडियावरील हा दावा दिशाभूल करणारा असल्याचे सरकारने आपल्या अधिकृत एक्स हँडलवरून स्पष्ट केले आहे. तसेच महाराष्ट्रात अशी कोणतीही राज्यव्यापी योजना नसून, काही जिल्हा परिषदा ग्रामीण मुली व महिलांना अनुदानावर ब्युटी पार्लर व शिवणकामाचे प्रशिक्षण देतात, असेही स्पष्ट करण्यात आले आहे. त्यामुळे अशा दिशाभूल करणाऱ्या पोस्टवर विश्वास ठेवू नये आणि त्याकडे दुर्लक्ष करावे, असा सल्ला देण्यात येत आहे.
स्रोत: मूळ बातमी
Leave a Reply