आगामी कुंभमेळ्याच्या पार्श्वभूमीवर शनिशिंगणापूर येथे भाविकांच्या वाढत्या गर्दीचे नियोजन करण्यात येत आहे. २०१५ मधील कुंभमेळ्यात वाहतूक कोंडी, अपुऱ्या सुविधा आणि दर्शन व्यवस्थेतील अडचणींचा अनुभव लक्षात घेऊन शनैश्वर देवस्थान ट्रस्ट आणि प्रशासनाने रस्ते, पिण्याचे पाणी, आरोग्यसेवा, निवास आणि सुलभ दर्शन यांचा आराखडा तयार केला आहे. याच काळात ५८ कोटी रुपये खर्चाचा पानसनाला घाट सुशोभीकरण प्रकल्प पूर्ण झाल्याने शनिक्षेत्राच्या वैभवात भर पडली आहे.
घाट प्रकल्पाचे वैशिष्ट्य
स्वयंभू शनिमूर्ती वाहून आलेल्या पानसनाल्याला गटारीचे स्वरूप आले होते. ते लक्षात घेऊन ट्रस्टने सुशोभीकरण प्रकल्प हाती घेतला. देवस्थानच्या वाहनतळापासून दर्शनरांग असणार आहे. मार्गाच्या दोन्ही बाजूंना कोरीवकाम केलेले ७५ पाषाणी स्तंभ बसवण्यात आले आहेत. याशिवाय २३ फूट उंचीचे आणि तीस टन वजनाचे आठ स्तंभ उभारण्यात आले आहेत. एकूण ७१० मीटर लांबीच्या घाट प्रकल्पावर एक जलबंधारा आणि त्यावर सात पाषाणी मंदिरे करण्यात आली आहेत. महाद्वारासमोर ७२ फूट उंचीचा नवग्रहस्तंभ पूर्ण झाला असून त्यावर नवग्रह देवता स्थापन करण्यात आल्या आहेत. शनिदर्शनानंतर भाविक लगेच निघून जातो; मात्र या प्रकल्पानंतर तो तीन ते चार तास थांबल्यास गावातील व्यवसाय वाढेल, अशी अपेक्षा व्यक्त करण्यात आली आहे.
दर्शन आणि गर्दीचे नियोजन
कुंभमेळा पर्वात अमावस्या यात्रेप्रमाणे नियोजन करण्यात आले आहे. चौथरा परिसरात गर्दी होऊ नये म्हणून महाद्वार येथेच तेल आणि पूजासाहित्य घेण्याची व्यवस्था राहील आणि तेथे स्क्रीन लावली जाणार आहे. वाहनतळापासून चार स्वतंत्र दर्शनरांगा आणि पर्यायी मार्ग असतील. सर्व रस्त्यांवर चौकशी आणि आरोग्य कक्ष राहतील. शनिशिंगणापूरजवळ रेणुकादरबार (काचमंदिर), नेवासे येथील पैसखांब मंदिर, नारदमुनी व म्हाळसा-खंडोबाचे पुरातन मंदिर, जगातील एकमेव मोहिनीराज मंदिर, देवगड येथील भगवान दत्तात्रेय मंदिर आणि प्रवरासंगम क्षेत्र ही ठिकाणे पाहण्यासारखी आहेत. अहिल्यानगर-संभाजीनगर महामार्गावर घोडेगाव आहे; तेथून चार किलोमीटर अंतरावर शनिशिंगणापूर असून बस आणि रिक्षाची सुविधा उपलब्ध आहे.
स्रोत: मूळ बातमी
Leave a Reply