विधान परिषदेच्या पाच जागांसाठी झालेल्या निवडणुकीत भाजपला केवळ पुणे शिक्षक मतदारसंघाची जागा राखता आली. अमरावती शिक्षक मतदारसंघाचा किल्ला मित्रपक्ष शिवसेनेने लढवून जिंकला. मात्र पदवीधरच्या तीनही मतदारसंघांतील पराभव पक्षाच्या जिव्हारी लागला आहे. या पराभवाची समीक्षा आता सुरू झाली असून त्याची झाडाझडती घेतली जाणार आहे.
नागपूरमधील पराभव पक्षासाठी विशेषतः वेदनादायी ठरला आहे, कारण नागपूर हे मुख्यमंत्री देवेंद्र फडणवीस यांचे मूळ गाव आहे. नागपूर पदवीधर मतदारसंघाच्या निवडणुकीत फडणवीस यांनी बंडखोरांची घरी जाऊन समजूत काढली होती आणि स्वतः प्रचारात उतरले होते. केंद्रीय मंत्री नितीन गडकरी यांनीही जोरदार प्रचार केला होता, तर महसूलमंत्री चंद्रशेखर बावनकुळे हेही प्रचाराच्या रणधुमाळीत होते. तरीही मूळ गावातच पक्षाला पराभव पत्करावा लागला.
नागपूर व पुणे विभागातील जिल्ह्यांचा लेखाजोखा
प्रदेशाध्यक्ष रविंद्र चव्हाण यांनी या पराभवाची गांभीर्याने दखल घेतली असून ते आता ॲक्शन मोडमध्ये आले आहेत. नागपूर व पुणे विभागातील सर्व जिल्ह्यांचा लेखाजोखा ते घेणार आहेत. पुणे पदवीधर मतदारसंघांतर्गत पुणे, सातारा, सांगली, कोल्हापूर आणि सोलापूर या जिल्ह्यांचा आढावा घेतला जाणार आहे. तर नागपूर पदवीधर मतदारसंघांतर्गत नागपूर, चंद्रपूर, भंडारा, गोंदिया, वर्धा आणि गडचिरोली या जिल्ह्यांची समीक्षा होणार आहे. जिल्हाध्यक्ष, आमदार आणि मंत्री यांची झाडाझडती घेतली जाणार असून काही पदाधिकाऱ्यांचा राजीनामा घेतला जाण्याची शक्यता वर्तवली जात आहे.
मित्रपक्षाच्या भूमिकेवरही अहवाल
पराभवाचे खापर आता मित्रपक्षावरही फोडले जात आहे. छत्रपती संभाजीनगर मराठवाडा पदवीधर निवडणुकीत आणि पुणे पदवीधर मतदारसंघात शिंदे सेनेवर खापर फोडण्यात आले आहे. पराभवाची समीक्षा करताना महायुतीच्या मित्रपक्षांनी घेतलेल्या भूमिकेबाबतही प्रदेशाध्यक्ष अहवाल देणार आहेत. चव्हाण हे २ नोव्हेंबरला केंद्रीय गृहमंत्री अमित शाह यांची भेट घेणार असून पराभवाचे संपूर्ण विश्लेषण त्यांच्यासमोर मांडणार असल्याची माहिती समोर येत आहे.
स्रोत: मूळ बातमी
Leave a Reply