जळगाव: विजेचा धक्का लागून वायरमनचा मृत्यू, परिसरात हळहळ

जळगावच्या पिंप्राळा परिसरात घरगुती इलेक्ट्रिक फिटिंगचे काम सुरू असताना विजेचा जोरदार धक्का लागून खासगी वायरमन योगेश उर्फ भय्या वाघ यांचा मृत्यू झाला. या घटनेमुळे पिंप्राळा परिसरात हळहळ व्यक्त होत आहे. भय्या वाघ शिवसेना (उबाठा) पक्षाचे विभागप्रमुख होते आणि प्रत्येकाच्या मदतीला धावणारे कार्यकर्ते म्हणून परिचित होते.

परिचितांनी जिल्हा रुग्णालयात दिलेल्या माहितीनुसार, योगेश वाघ बुधवारी, २८ तारखेला सकाळी नेहमीप्रमाणे कामासाठी घराबाहेर पडले होते. पिंप्राळा परिसरात एका घरात इलेक्ट्रिक फिटिंगचे काम सुरू असताना त्यांना अचानक विजेचा जोरदार धक्का बसल्याने ते जागेवरच बेशुद्ध पडले. पिंप्राळ्यातील तरुणांनी त्यांना उचलून जिल्हा सामान्य रुग्णालयात धाव घेतली, मात्र तेथील डॉक्टरांनी तपासणीनंतर त्यांना मृत घोषित केले. या प्रकरणी रामानंदनगर पोलिस ठाण्यात अकस्मात मृत्यूची नोंद झाली आहे.

कुटुंबीयांना मोठा धक्का

सकाळी नेहमीप्रमाणे कामावर गेलेल्या भय्या वाघ यांच्या मृत्यूची बातमी दुपारी कळताच त्यांच्या कुटुंबीयांसह मित्रपरिवाराला मोठा मानसिक धक्का बसला आहे. परिसरातील नागरिकांनीही या घटनेबद्दल दुःख व्यक्त केले आहे.

रुग्णालयात कार्यकर्त्यांची गर्दी

निधनाचे वृत्त कळताच शिवसेना पदाधिकारी गजानन मालपुरे, माजी महानगराध्यक्ष कुलभूषण पाटील, माजी नगरसेवक आबा कापसे यांच्यासह कार्यकर्ते आणि शिवसैनिकांनी जिल्हा रुग्णालयात गर्दी केली. पदाधिकारी आणि कार्यकर्त्यांनी आपल्या संवेदना व्यक्त केल्या.

स्रोत: मूळ बातमी