श्री सप्तशृंगी गडावरील नवरात्रोत्सव आणि कोजागिरी पौर्णिमा यात्रेनिमित्त महाराष्ट्र राज्य मार्ग परिवहन महामंडळाच्या नाशिक विभागाने केलेल्या उत्कृष्ट नियोजनामुळे एसटीच्या तिजोरीत तब्बल चार कोटी ९४ लाख ५८ हजार ७०४ रुपयांची कमाई झाली आहे. या दोन्ही यात्रांच्या काळात तब्बल सात लाख २४ हजार १५३ भाविकांनी एसटीच्या सुलभ व सुरक्षित सेवेचा लाभ घेतला.
नवरात्रोत्सवातील वाहतूक
विभागीय नियंत्रक भगवान जगनोर यांच्या मार्गदर्शनाखाली यात्राप्रमुख म्हणून विभागीय वाहतूक अधिकारी उमेश बिरारी व सर्व आगार प्रमुखांनी नवरात्रोत्सव व कोजागिरी उत्सवाचे नियोजन केले. नऊ ते २० ऑक्टोबर २०२६ या नवरात्रोत्सव काळात नाशिक ते सप्तशृंगगड, नांदुरी ते सप्तशृंगी गड तसेच नाशिक जिल्ह्यातील विविध ११ आगारातून जादा बसेस सोडण्यात आल्या. नवरात्रोत्सवाच्या दोन दिवस आधी, नऊ ऑक्टोबर ते २० ऑक्टोबर दरम्यान घाटरस्ता खासगी वाहनांसाठी बंद करण्यात आला होता. या बारा दिवसांच्या कालावधीत १९ हजार ६१९ बस फेऱ्यांच्या माध्यमातून पाच लाख ५४ हजार ०८७ किलोमीटर वाहतूक करण्यात आली. या प्रवासातून महामंडळाला तीन कोटी ८९ लाख ९८ हजार २५ रुपये उत्पन्न मिळाले.
कोजागिरीसाठी जादा गाड्या
नवरात्रोत्सवानंतर २४ व २६ ऑक्टोबर २०२६ दरम्यान साजरी झालेल्या कोजागिरी पौर्णिमा यात्रेसाठीही एसटी प्रशासनाने विशेष नियोजन केले होते. या दोन दिवसांत पाच हजार २९३ बस फेऱ्यांच्या माध्यमातून एक लाख ५८ हजार ४१३ किलोमीटर बसेस चालवण्यात आल्या. यातून महामंडळाला एक कोटी चार लाख ६० हजार ६७९ रुपयांचे उत्पन्न प्राप्त झाले. नांदुरी पायथा ते सप्तशृंगगड मार्गावर दर दहा मिनिटांनी आणि अर्ध्या तासाने बसेस सोडण्यात येत होत्या. नवरात्रोत्सव व कोजागिरी पौर्णिमेदरम्यान लाखो भाविकांना सुरक्षित, सुखकर आणि वेळेत सेवा देण्यासाठी नाशिक विभागातील सर्व कर्मचारी व अधिकारी अहोरात्र कार्यरत होते, असे विभागीय नियंत्रकांनी सांगितले.
स्रोत: मूळ बातमी
Leave a Reply