कोपरगाव येथील संजीवनी अभियांत्रिकी महाविद्यालय आणि एमबीए विभागातील पाच प्राध्यापकांच्या संशोधन कामाची जागतिक पातळीवर नोंद झाली आहे. ‘स्कॉलरली इंडेक्स्ड’ या व्यासपीठाच्या टॉप १००० स्कॉलर क्रमवारीत या पाचही शिक्षकांनी आपापल्या विषयात स्थान पटकावले आहे. त्यामुळे संस्थेच्या संशोधनाभिमुख वाटचालीला आंतरराष्ट्रीय ओळख मिळाली आहे.
कोणत्या क्षेत्रात कोणते स्थान
स्ट्रक्चरल अॅनालिसिस अँड ऑप्टिमायझेशन या विषयात डॉ. ए. एस. सय्यद यांना जगात ८१ वा क्रमांक मिळाला असून त्यांचा इम्पॅक्ट स्कोअर ९५.३७ आहे. याच विषयात डॉ. भारती शिंदे यांनी ९०.०१ गुणांसह ६१६ वे स्थान मिळवले. पावडर मेटलर्जी टेक्निक्स अँड मटेरियल्समध्ये डॉ. नवीन कुमार १८५ व्या क्रमांकावर असून त्यांचा गुणांक ६७.५८ आहे.
विद्युत अभियांत्रिकी विभागाचे प्रमुख डॉ. दीपेश परदेशी यांनी आयओटी आधारित स्मार्ट होम सिस्टिम्स या क्षेत्रात ८२.६१ गुणांसह २९२ वे स्थान मिळवले. तर कस्टमर सर्व्हिस क्वालिटी अँड लॉयल्टी या क्षेत्रात डॉ. रितेश पटेल यांनी ७३.९२ गुणांसह ८६७ वा क्रमांक पटकावला.
संस्थेकडून अभिनंदन
या यशानिमित्त संजीवनी विद्यापीठाचे अध्यक्ष अमित कोल्हे यांनी पाचही प्राध्यापकांचा सत्कार केला. संजीवनीचे अध्यक्ष नितीन कोल्हे यांनीही त्यांचे अभिनंदन केले. या वेळी संचालक डॉ. आर. ए. कापगते उपस्थित होते. पाच प्राध्यापकांचे हे यश संपूर्ण संजीवनी परिवारासाठी अभिमानाचे असल्याचे अमित कोल्हे यांनी सांगितले. अशा यशामुळे संस्थेतील संशोधन संस्कृती आणखी मजबूत होईल आणि भविष्यात जागतिक पातळीवर ठसा उमटवणारे संशोधन घडेल, असा विश्वासही त्यांनी व्यक्त केला.
स्रोत: मूळ बातमी
Leave a Reply