‘वरवरचे वधू-वर’: हास्याबरोबर नात्यांवर अंतर्मुख करणारे नाटक

घरच्यांचा लग्नासाठीचा आग्रह, करिअरची धावपळ, जोडीदाराकडून असलेल्या अपेक्षा आणि प्रेमाऐवजी व्यावहारिक गरजेतून लग्नाचा करार करण्याचा निर्णय — आजच्या तरुणाईच्या आयुष्यातील या गुंतागुंतीच्या गोष्टींना विनोदाची फोडणी देत ‘वरवरचे वधू-वर’ या नाटकाने प्रेक्षकांना खळखळून हसवले. मात्र, हास्याच्या या प्रवासात लग्नसंस्था, नात्यांमधील अपेक्षा आणि बदलती मानसिकता यावर विचार करायलाही भाग पाडले. नाट्यमहोत्सवानिमित्त शनिवारी (ता. २४) उस्मानपुरा येथील संत एकनाथ रंगमंदिरात सादर झालेल्या या नाटकाला रसिकांनी टाळ्यांच्या कडकडाटात दाद दिली.

आजच्या तरुणाईची गोष्ट

नाटकाची गोष्ट आहे मोहित माने (सुव्रत जोशी) आणि विशाखा माने (सखी गोखले) या दोन समकालीन तरुणांची. कॉर्पोरेट जगतात कामाच्या व्यापात अडकलेल्या या दोघांनाही घरच्यांच्या लग्नाच्या आग्रहाला सामोरे जावे लागते. लेखक-दिग्दर्शक विराजस कुलकर्णी यांनी आजच्या पिढीची मानसिकता, लग्नाविषयीचे बदलते विचार, करिअरची धावपळ आणि सोशल मीडियाचा प्रभाव यांची संहितेत सुरेख गुंफण केली आहे. नाटकाचे नाव ‘वरवरचे’ असले, तरी त्यातील प्रसंग नात्यांच्या खोलवर जाणाऱ्या भावविश्वाचा वेध घेतात. सूरज पारसनीस यांनीही आपल्या भूमिकेतून विनोदाची रंगत वाढवली. अपर्णा अध्यापक यांनी सूत्रसंचालन केले.

कलाकारांचा सत्कार

नाट्यप्रयोगाच्या सुरवातीला डॉ. चिन्मय बाऱ्हाळे, रमेश राजपूत, सुव्रत जोशी, सखी गोखले आणि सूरज पारसनीस उपस्थित होते. या वेळी सखी गोखले, सुव्रत जोशी, सूरज पारसनीस, रमेश राजपूत आणि डॉ. चिन्मय बाऱ्हाळे यांचा सत्कार करण्यात आला. खट्याळ, मार्मिक भाष्य आणि बहारदार सादरीकरणामुळे हे नाटक प्रेक्षकांच्या मनात घर करून गेले.

स्रोत: मूळ बातमी