ग्रामीण महिलांसाठी मोफत प्रसूती आणि सोनोग्राफी सेवा

नाशिकमधील एसएमबीटी हॉस्पिटलच्या वतीने ग्रामीण भागातील गरजू महिलांसाठी प्रसूती आणि सोनोग्राफी तपासण्या मोफत केल्या जात आहेत. सामान्य प्रसूतीबरोबरच शस्त्रक्रियेद्वारे होणारी प्रसूती तसेच चार सोनोग्राफी तपासण्या विनामूल्य दिल्या जात आहेत. माता व बालमृत्यू रोखणे आणि सुरक्षित मातृत्वाला चालना देणे, हा या उपक्रमामागचा उद्देश आहे.

हजारो महिलांना लाभ

हॉस्पिटलने दिलेल्या माहितीनुसार, आतापर्यंत पाच हजारांहून अधिक महिलांनी प्रसूतिपूर्व आरोग्यसेवेचा लाभ घेतला आहे. तसेच १८ हजारांहून अधिक सोनोग्राफी तपासण्या मोफत करण्यात आल्या आहेत. विविध मोफत सुविधांचा थेट फायदा दोन हजारांहून अधिक लाभार्थ्यांना मिळाला आहे.

गर्भधारणेपासून ते प्रसूतीपर्यंतच्या काळात महिलांना आहार, व्यायाम, गर्भाची वाढ, उच्च जोखमीची गर्भधारणा, रक्ताल्पता प्रतिबंध आणि नवजात बालकांची काळजी याबाबत तज्ज्ञांकडून मार्गदर्शन दिले जाते. महिलांचा आत्मविश्वास वाढावा, यासाठी गेल्या दोन वर्षांपासून डोहाळे जेवणाचे कार्यक्रमही आयोजित केले जात आहेत. आतापर्यंत २४ डोहाळे जेवणाचे कार्यक्रम झाले आहेत.

बालकांनाही मोफत उपचार

जन्मापासून ते १६ वर्षांपर्यंतच्या बालकांसाठी विविध आजारांवरील उपचार, औषधोपचार आणि आवश्यक आरोग्यसेवा मोफत उपलब्ध आहेत. ग्रामीण भागातील गरजू महिलांपर्यंत सुविधा पोहोचवण्यासाठी आरोग्यमित्र कार्यरत आहेत. महिलांना वेळेवर तपासणी आणि उपचार मिळावेत, यासाठी ते प्रोत्साहन देतात. त्यामुळे आर्थिकदृष्ट्या दुर्बल कुटुंबांवरील उपचारांचा खर्च कमी होण्यास मदत होत आहे.

डोहाळे जेवणाच्या माध्यमातून आरोग्यजागृती होतेच, शिवाय वैद्यकीय विद्यार्थ्यांमध्ये रुग्णांप्रति संवेदनशीलता आणि माणुसकीची भावना रुजवली जात असल्याचे स्त्रीरोग विभागप्रमुखांनी सांगितले.

स्रोत: मूळ बातमी