नंदुरबार जिल्ह्यातील सहाही तालुक्यांमधून २३ हजार ८३९ असाक्षर नागरिक ८१० केंद्रांवर २५ ऑक्टोबर रोजी परीक्षा देणार आहेत. ‘उल्लास’ नवभारत साक्षरता कार्यक्रमांतर्गत असाक्षर नागरिकांची पायाभूत साक्षरता आणि संख्याज्ञान विषयक चाचणी घेण्याचा निर्णय घेण्यात आला आहे. वयाची कोणतीही अट न बाळगता ही परीक्षा होणार असून, ही चाचणी केवळ परीक्षा नसून प्रौढांमधील शिक्षणाची ओढ आणि जिद्द जगासमोर आणणारा एक सामाजिक उत्सव ठरणार आहे. जिल्ह्यातील हा प्रयोग शिक्षण क्षेत्रातील अनोखा आणि प्रेरणादायी उपक्रम ठरेल, अशी अपेक्षा व्यक्त केली जात आहे.
कोण सहभागी होणार?
या विशेष परीक्षेत यंदा नव्याने नोंदणी झालेले असाक्षर, यापूर्वी परीक्षा न दिलेले तसेच ‘नीड इम्प्रूव्हमेंट’ असा शेरा मिळालेले परीक्षार्थी सहभागी होणार आहेत. ज्या शाळांमधून असाक्षरांची नोंदणी करण्यात आली आहे, त्याच शाळा त्यांचे परीक्षा केंद्र राहणार आहेत, त्यामुळे परिचयाच्या वातावरणात ही परीक्षा पार पडेल. यासाठी जिल्हा प्रशासनाकडून जोरदार तयारी करण्यात आली आहे.
प्रश्नपत्रिकेचे स्वरूप आणि व्यवस्था
ही परीक्षा अत्यंत सुटसुटीत आणि मार्गदर्शक स्वरूपाची असून प्रश्नपत्रिकेत एकूण तीन विभाग असणार आहेत. प्रत्येक विभागाला ५० गुण निश्चित करण्यात आले असून एकूण १५० गुणांची चाचणी राहील. परीक्षार्थींना प्रत्येक विभागात उत्तीर्ण होण्यासाठी किमान १६.५ गुण मिळवणे आवश्यक आहे, तर संपूर्ण पत्रिकेसाठी एकूण ४९.५ गुण मिळवणे अनिवार्य केले आहे. आवश्यक गुण न मिळाल्यास ५ वाढीव (ग्रेस) गुण देण्याची सुविधा आहे. सकाळी १० ते सायंकाळी ५ या वेळेत परीक्षार्थी परीक्षा केंद्रावर उपस्थित राहतील, तेव्हापासून त्यांना पेपर सोडवण्यासाठी सलग तीन तासांचा अवधी दिला जाईल. दिव्यांग परीक्षार्थींसाठी एक तास अतिरिक्त वेळ वाढवून देण्यात आला आहे. परीक्षा सुरळीत पार पाडण्यासाठी जिल्हाधिकारी डॉ. मिताली सेठी आणि जिल्हा परिषदेचे मुख्य कार्यकारी अधिकारी नमन गोयल यांच्या मार्गदर्शनाखाली शिक्षणाधिकारी उर्मिला पारधे यांनी भरारी पथक तयार केले आहे. तालुक्याचे परीक्षा विषयक कामकाज गटशिक्षणाधिकाऱ्यांच्या समन्वयातून पार पडेल. शिक्षणाला वयाचे कोणतेही बंधन नाही, हे या उपक्रमातून साध्य होणार असल्याचे शिक्षणाधिकारी (योजना) उर्मिला पारधे यांनी सांगितले.
स्रोत: मूळ बातमी
Leave a Reply