कोपरगाव येथील के. जे. सोमैया महाविद्यालयात ग्रामीण विद्यार्थ्यांसाठी स्टार्टअप विषयक कार्यशाळा झाली. ‘ग्रामीण स्टार्टअप्स: आव्हाने, संधी आणि यशोगाथा’ या विषयावर विद्यार्थ्यांशी संवाद साधताना गोदावरी इक्विपमेंट्स प्रा. लि.चे संस्थापक भाऊसाहेब कळवाघे यांनी तरुणांना स्वतःचा व्यवसाय उभारण्याचा सल्ला दिला.
मोठी स्वप्ने, छोटी सुरुवात
ग्रामीण भागातील विद्यार्थ्यांनी केवळ नोकरीच्या मागे न लागता स्वतःच्या कौशल्यातून व्यवसाय उभारण्याचा प्रयत्न करावा, असे कळवाघे म्हणाले. मोठी स्वप्ने जरूर पाहावीत, मात्र त्यांच्या पूर्ततेसाठी सुरुवात छोट्या व्यवसायापासून करावी. छोट्या व्यवसायातून अनुभव, आत्मविश्वास आणि आर्थिक स्थैर्य मिळते आणि त्यानंतर व्यवसायाचा विस्तार करता येतो, असे त्यांनी सांगितले.
शेतीपूरक व्यवसाय ही ग्रामीण विद्यार्थ्यांसाठी उत्तम संधी असल्याचेही त्यांनी नमूद केले. शेती ही केवळ उपजीविकेचे साधन न राहता उद्योजकतेचे माध्यम बनली पाहिजे. स्थानिक उपलब्ध संसाधने, शेतीतील समस्या आणि बाजारपेठेच्या गरजा ओळखून त्यातून नवीन व्यवसायाच्या संधी निर्माण कराव्यात, असे आवाहन त्यांनी केले.
उद्योजकता संस्कृती रुजवण्याचा प्रयत्न
ही कार्यशाळा महाविद्यालयाच्या गुणवत्ता हमी कक्ष, स्टार्टअप अँड इनोव्हेशन सेल आणि सावित्रीबाई फुले पुणे विद्यापीठ यांच्या संयुक्त विद्यमाने आयोजित करण्यात आली होती. अध्यक्षस्थानी प्राचार्य डॉ. विजय ठाणगे होते. विद्यार्थ्यांमध्ये उद्योजकता, नवोपक्रम आणि स्टार्टअपची संस्कृती विकसित व्हावी, यासाठी स्टार्टअप अँड इनोव्हेशन सेल सातत्याने उपक्रम आणि व्याख्याने आयोजित करीत असतो, असे डॉ. ठाणगे यांनी सांगितले. डॉ. नामदेव ढोकळे यांनी प्रास्ताविक व स्वागत केले, तर डॉ. नीलेश पोटे यांनी आभार मानले. प्रा. चंचल विभुते आणि प्रा. कीर्ती वाकचौरे यांनी सूत्रसंचालन केले. याप्रसंगी प्रा. सदाशिव नागरे, डॉ. शंकरय्या कोंडा, डॉ. रवींद्र जाधव, प्रा. वैष्णवी मगर यांच्यासह विद्यार्थी उपस्थित होते.
Leave a Reply