पाकिस्तानचे सांस्कृतिक आणि ऐतिहासिक शहर म्हणून ओळखले जाणारे लाहोर पुन्हा एकदा जगातील सर्वात प्रदूषित शहर ठरले आहे. रविवारी सकाळी नऊ ते दहा या वेळेत लाहोरचा हवा गुणवत्ता निर्देशांक तब्बल ५३८ इतका नोंदवला गेला. हा निर्देशांक आरोग्यासाठी अतिशय धोकादायक श्रेणीत मोडतो. स्विस वायू गुणवत्ता निरीक्षण मंच आयक्यूएअरने प्रसिद्ध केलेल्या ताज्या आकडेवारीत ही माहिती समोर आली आहे.
कराची, कैरो मागे; पंजाब प्रांतात आठ शहरे
या जागतिक यादीत लाहोर पहिल्या क्रमांकावर असून, १८० निर्देशांकासह पाकिस्तानचेच कराची शहर दुसऱ्या, तर १६२ निर्देशांकासह इजिप्तमधील कैरो तिसऱ्या स्थानी राहिले. लाहोर आणि कराची यांच्यातील मोठी तफावत पाहता लाहोरमधील हवा किती विषारी झाली आहे, याचा अंदाज येतो. पाकिस्तानमधील दहा सर्वाधिक प्रदूषित शहरी केंद्रांपैकी तब्बल आठ शहरे एकट्या पंजाब प्रांतातील आहेत. लाहोर जिल्ह्यातील काहना नौ या भागात देशातील सर्वात खराब हवेची गुणवत्ता नोंदवली गेली असून तेथील निर्देशांक तब्बल ६०६ इतका होता. त्यापाठोपाठ बहावलपूर ५३६, सरगोधा ३९२ आणि गुजरानवाला ३४७ असा क्रम लागतो. मुलतान, डेरा गाझी खान, स्कार्दू, फैसलाबाद आणि पेशावर या शहरांमधील हवेची गुणवत्ताही अत्यंत खालावली आहे.
श्वसनाचा त्रास वाढला; प्रशासनाच्या मोहिमा अपयशी
या विषारी हवेमुळे लहान मुले, ज्येष्ठ नागरिक आणि दम्याचा त्रास असलेल्या रुग्णांचे जगणे कठीण झाले आहे. विषारी उत्सर्जन रोखण्यात प्रशासनाला आलेले अपयश आणि बिघडत चाललेले पर्यावरणीय संतुलन यामुळे संपूर्ण पाकिस्तानात श्वसनाच्या संकटाची घंटा वाजू लागली आहे. गेल्या काही आठवड्यांपासून लाहोर शहर जागतिक प्रदूषण निर्देशांकात सातत्याने पहिल्या क्रमांकावर आहे. शनिवारी संध्याकाळी येथील निर्देशांक २६६ नोंदवला गेला होता, तर शुक्रवारी सकाळी सात ते आठ दरम्यान तो ४६५ वर पोहोचला होता.
हवेची गुणवत्ता सातत्याने घसरत असल्याने पंजाब प्रांतीय प्रशासनाने सुरू केलेल्या धुकेविरोधी मोहिमांचे अपयश चव्हाट्यावर आले आहे. नागरिकांमध्ये सरकारविरोधात तीव्र नाराजी आहे. मात्र, दुसरीकडे लाहोर वाहतूक पोलिसांनी प्रदूषण पसरवणाऱ्या वाहनांविरुद्ध कडक कारवाई केल्याचा दावा केला आहे. वायुप्रदूषण हे जगभरातील मृत्यूचे दुसरे सर्वात मोठे कारण मानले जाते. घराबाहेरील आणि घरातील वायुप्रदूषणामुळे दरवर्षी जगभरात अंदाजे ८१ लाख लोकांचा अकाली मृत्यू होतो, त्यापैकी बाहेरील हवेतील अतिसूक्ष्म विषारी कणांमुळे तब्बल ४७ लाख लोकांना जीव गमवावा लागतो.
Leave a Reply