इगतपुरी तालुक्यातील रहिवासी असलेली साक्षी चांडक हिने सीए इंटरमिजिएट सप्टेंबर २०२६ परीक्षेत राष्ट्रीय क्रमवारीत प्रथम क्रमांक पटकावला आहे. गुरुवारी (ता. २३) जाहीर झालेल्या निकालात तिच्या यशाची घोषणा झाल्यानंतर परिसरात आनंदाचे वातावरण पसरले आहे. तिचे वडील प्रकाश चांडक यांचा इगतपुरी येथे कापड विक्रीचा व्यवसाय असून आई पूनम चांडक या गृहिणी आहेत. व्यवसाय पार्श्वभूमीच्या कुटुंबातून असूनही साक्षीने सनदी लेखापाल होण्याचा मार्ग निवडला.
दहावीनंतर ठरलेले उद्दिष्ट
साक्षीचे प्राथमिक ते दहावीपर्यंतचे शिक्षण इगतपुरीत सीबीएसई बोर्डात झाले. अकरावी आणि बारावीसाठी ती नाशिकच्या बीवायके महाविद्यालयात दाखल झाली. शालेय जीवनापासूनच हुशार असलेल्या साक्षीने दहावीत अव्वल तर बारावीत महाविद्यालयातून चौथा क्रमांक मिळवला होता. २०२५ मध्ये झालेल्या सीए फाउंडेशन परीक्षेतही तिने देशात चौथा क्रमांक पटकावला होता. दहावीनंतर सीए व्हायचे हा निश्‍चय ठरवून तिने त्यादिशेने परीश्रम सुरू केले होते.
अभ्यासाची कठोर पद्धत आणि विद्यार्थ्यांसाठी टिप्स
शिकवणी सुरू असताना साक्षी रोज सुमारे दहा तासांच्या व्याख्यानांसह पाच ते सहा तास स्वयंअध्ययन करत होती. परीक्षेपूर्वीच्या शेवटच्या चार महिन्यांत तिने रोज बारा ते चौदा तास कसून अभ्यास केला. सोशल मीडियामुळे लक्ष विचलित होऊ नये म्हणून तिने सर्व सोशल मीडिया ॲपपासून अंतर ठेवले होते. विद्यार्थ्यांसाठी तिने अभ्यास पहिल्या दिवसापासून सुरू करण्याची, बॅकलॉग न ठेवण्याची, काटेकोर वेळापत्रक पाळण्याची, चाचण्यांतील चुका स्वतंत्र वहीत नोंदवण्याची आणि अभ्यासादरम्यान मोबाईल स्वतःजवळ न ठेवण्याची सल्ला दिला आहे. आता सीए फायनलमध्येही राष्ट्रीय क्रमवारीत स्थान मिळवण्याचे तिचे ध्येय आहे.
स्रोत: मूळ बातमी
Leave a Reply