हरियाणा काँग्रेसचे माजी प्रदेशाध्यक्ष आणि माजी कॅबिनेट मंत्री चौधरी फूलचंद मुलाना यांचे शुक्रवारी सकाळी निधन झाले. ते ८५ वर्षांचे होते. गेल्या काही दिवसांपासून ते किडनीच्या आजाराने त्रस्त होते. खासगी रुग्णालयात त्यांच्यावर उपचार सुरू होते. त्यांच्या निधनाने हरियाणाच्या राजकीय वर्तुळात शोक व्यक्त केला जात आहे.
चौधरी फूलचंद मुलाना हे हरियाणा काँग्रेसमध्ये सर्वाधिक काळ प्रदेशाध्यक्षपद सांभाळनारे नेते होते. त्यांनी तब्बल साडेसहा वर्षे पक्षाची धुरा सांभाळली होती. मुलाना विधानसभा मतदारसंघातून ते चार वेळा आमदार म्हणून निवडून आले होते. त्यांचे पुत्र वरुण चौधरी हे अंबाला लोकसभा मतदारसंघाचे काँग्रेस खासदार आहेत, तर त्यांच्या सून पूजा चौधरी या मुलाना विधानसभा मतदारसंघाच्या आमदार आहेत. वरुण चौधरी यांनी समाजमाध्यमांवरील पोस्टद्वारे वडिलांच्या निधनाची माहिती दिली.
शुक्रवारी सकाळी प्रकृती बिघडली
रुग्णालयातून डिस्चार्ज मिळाल्यानंतर चौधरी फूलचंद मुलाना हे पंचकुला येथील आपल्या घरी होते. मात्र, शुक्रवारी सकाळी अचानक त्यांची प्रकृती बिघडल्याने त्यांना पुन्हा रुग्णालयात दाखल करण्यात आले. तिथे सकाळी सुमारे नऊ वाजता त्यांनी अखेरचा श्वास घेतला. त्यांचे पार्थिव अंत्यसंस्कारासाठी अंबाला येथे आणण्यात आले आहे.
हुड्डा यांनी व्यक्त केला शोक
हरियाणा विधानसभेतील विरोधी पक्षनेते भूपेंद्र सिंह हुड्डा यांनीही त्यांच्या निधनावर शोक व्यक्त केला आहे. समाजमाध्यम एक्सवर पोस्ट करत त्यांनी म्हटले की, आमचे जवळचे सहकारी, हरियाणा प्रदेश काँग्रेसचे माजी अध्यक्ष आणि आमच्या काँग्रेस सरकारमध्ये मंत्री राहिलेले चौधरी फूलचंद मुलाना यांच्या निधनाचे वृत्त ऐकून मला अत्यंत दुःख झाले आहे. चौधरी फूलचंद मुलाना यांच्या निधनाने हरियाणा काँग्रेसमधील एका ज्येष्ठ नेत्याची कारकीर्द संपुष्टात आली आहे.
Leave a Reply