मराठी मनोरंजनविश्वात सध्या नव्या मालिकांची चर्चा रंगत आहे. प्रेक्षकांना नेहमीच वेगवेगळ्या विषयांवरील कथा देणारी कलर्स मराठी वाहिनी आता आणखी एक नवी मालिका घेऊन येण्यासाठी सज्ज झाली आहे. या वेळी प्रेक्षकांना केवळ प्रेमकथा पाहायला मिळणार नाही, तर या कथेला देशप्रेम आणि देशसेवेचीही पार्श्वभूमी असणार आहे. मालिकेचा टीझर एआय तंत्रज्ञानाच्या मदतीने तयार करण्यात आला आहे, त्यामुळे टीझरमधील दृश्यांमध्ये एक वेगळेपणा पाहायला मिळतो.
मालिकेची कथा आणि टीझर
कलर्स मराठी वाहिनीवर सुरू होणाऱ्या नव्याकोऱ्या मालिकेचे नाव ‘लागलिया ओढ जिवा’ असे आहे. मालिकेच्या पहिल्या टीझरने प्रेक्षकांचे लक्ष वेधून घेतले आहे. मात्र अद्याप मालिकेची रिलीज डेट आणि वेळा जाहीर करण्यात आली नाही. टीझरला हटके कॅप्शन देण्यात आले आहे. त्यात लिहिले आहे की, साताऱ्याच्या मातीत देशप्रेमाचे स्वप्न पूर्ण होणार आणि प्रेम फुलणार; येतेय एक नवी ‘खट’ लवस्टोरी, जी नुसते ‘याड’ नाही, तर ‘ओढ’ही लावणार. ‘लागलिया ओढ जिवा’ ही मालिका लवकरच कलर्स मराठीवर येणार आहे. या मालिकेची पार्श्वभूमी साताऱ्याची आहे. साताऱ्याच्या मातीतील रांगडेपणा, तिथली खास बोलीभाषा आणि स्थानिक संस्कृतीचा गोडवा या टीझरमध्ये पाहायला मिळतो. याच वातावरणात एका तरुण जोडप्याची प्रेमकहाणी फुलताना दिसणार आहे. मात्र या प्रेमकथेचे वैशिष्ट्य म्हणजे या दोघांचे स्वप्न केवळ एकमेकांसोबत आयुष्य घालवण्यापुरते मर्यादित नाही. देशासाठी काहीतरी करण्याची आणि मातृभूमीची सेवा करण्याची इच्छा या दोघांच्याही मनात आहे. त्यामुळे त्यांच्या प्रेमप्रवासाला देशभक्तीची एक वेगळी किनार लाभणार आहे.
मुख्य कलाकारांचे चेहरे गुलदस्त्यात
या मालिकेच्या टीझरमधील आणखी एक महत्त्वाची बाब म्हणजे मुख्य कलाकारांची ओळख अद्याप समोर आलेली नाही. टीझरमध्ये तरुण जोडप्याची झलक दाखवण्यात आली असली, तरी त्यांच्या चेहऱ्यांबाबत गुपित कायम ठेवण्यात आले आहे. टीझरच्या शेवटी हे दोघेही एनसीसी कॅडेट्सच्या गणवेशात दिसतात. त्यामुळे मालिकेतील पात्रांचा देशसेवेशी असलेला संबंध अधिक ठळकपणे समोर येतो. टीझरमधील संवादातून कथेची दिशा स्पष्ट होते. त्यात म्हटले आहे की, साताऱ्याची हवा भारी असून, मातीत प्रेमाची खुमारी भिनली आहे; पण दोघांचेही स्वप्न एकच होते — आधी देशासाठी एकत्र झटायचे आणि मग प्रेमात रंगायचे. प्रेम, त्याग, जिद्द आणि देशसेवेची भावना या सगळ्यांचा संगम मालिकेत पाहायला मिळणार आहे. या नव्या जोडीची निवड कोणाची झाली आहे, त्यांची ऑनस्क्रीन केमिस्ट्री कशी असेल आणि ही प्रेमकहाणी कोणते वळण घेणार, याबाबत प्रेक्षकांमध्ये उत्सुकता निर्माण झाली आहे. एकीकडे प्रेमाची हळुवार भावना आणि दुसरीकडे देशासाठी काहीतरी करण्याची जिद्द, अशा वेगळ्या विषयाची मांडणी या मालिकेतून होणार आहे. त्यामुळे ही नवी मालिका प्रेक्षकांच्या पसंतीस उतरते का आणि साताऱ्याच्या मातीत फुलणारी ही प्रेमकहाणी किती लोकप्रिय ठरते, हे पाहणे महत्त्वाचे ठरणार आहे.
Leave a Reply