भारताचे माजी कर्णधार महेंद्रसिंग धोनी यांच्याबाबत एक धक्कादायक किस्सा समोर आला आहे. माजी क्रिकेटपटू आणि समालोचक आकाश चोप्रा यांनी सांगितलं आहे की, 2023 मध्ये चेन्नईच्या एका खेळाडूने धोनीला शिवीगाळ केली होती. असं असूनही त्या खेळाडूला संघातून काढून टाकण्यात आलं नाही. चेन्नईने अखेरीस त्या वर्षी आयपीएलचं विजेतेपद पटकावलं. कर्णधाराने संघाच्या फायद्यासाठी त्या खेळाडूला संघात कायम ठेवलं आणि ट्रॉफी जिंकली.
धोनीने घरी पाठवण्यास दिला नकार
आकाश चोप्रा यांनी त्यांच्या व्हिडिओ चॅनलवर ही घटना उघड केली. त्यांनी सांगितलं की, चेन्नईच्या एका खेळाडूने धोनीसोबत गैरवर्तन केलं होतं. परिस्थिती इतकी चिघळली की, संघातील लोकांनी धोनीला त्या खेळाडूला घरी पाठवण्याचा सल्ला दिला. त्यांच्या मते, संघ त्याच्याशिवायही चांगली कामगिरी करू शकत होता. मात्र धोनीने तसं करण्यास नकार दिला. आकाश चोप्रा यांनी धोनीच्या विचारसरणीचं कौतुक केलं.
चोप्रा यांच्या मते, धोनीने खेळाडूच्या चुकांपेक्षा संघाच्या हिताला प्राधान्य दिलं. धोनीच्या म्हणण्यानुसार, तो खेळाडू चुकीचं वागत होता, पण कर्णधार म्हणून अहंकार आडवा येऊ दिला असता तर त्याला घरी पाठवता आलं असतं. मात्र तो खेळाडू संघासाठी उपयुक्त ठरणार होता आणि चेन्नईला जिंकण्यास मदत करणार होता. त्यामुळे अहंकार बाजूला ठेवून त्याला खेळवत राहण्याचा निर्णय धोनीने घेतला.
नाव उघड नाही, निर्णय मात्र फायदेशीर
आकाश चोप्रा यांनी धोनीचा निर्णय उत्कृष्ट असल्याचं म्हटलं. ते म्हणाले की, धोनीने वैयक्तिक वैमनस्याचा संघाच्या कामगिरीवर परिणाम होऊ दिला नाही. मात्र चोप्रा यांनी त्या खेळाडूचं नाव उघड केलं नाही. तो खेळाडू धोनीसोबत असं का वागला, हे देखील स्पष्ट झालेलं नाही. त्या खेळाडूला संघात कायम ठेवण्याचा निर्णय अखेरीस फायदेशीर ठरला आणि चेन्नईने 2023 मध्ये विजेतेपद पटकावलं. महेंद्रसिंग धोनीच्या नेतृत्वाखाली चेन्नई सुपर किंग्सने पाच वेळा आयपीएल जिंकली आहे. संघाने 2010, 2011, 2018, 2021 आणि 2023 मध्ये विजेतेपद पटकावलं. धोनीने चेन्नईला दोनदा चॅम्पियन्स लीग टी-20 चं विजेतेपदही मिळवून दिलं.
भारतीय कर्णधार म्हणून धोनीची कामगिरीही प्रभावी राहिली आहे. त्याच्या नेतृत्वाखाली भारताने 2007 चा टी-20 विश्वचषक, 2011 चा एकदिवसीय विश्वचषक आणि 2013 ची चॅम्पियन्स ट्रॉफी जिंकली. आकाश चोप्रा म्हणाले की, धोनीचं योगदान केवळ धावा करणं किंवा यष्टीमागे कामगिरी करण्यापुरतं मर्यादित नव्हतं. आयपीएलला मोठं नाव मिळवून देण्यात त्याने महत्त्वाची भूमिका बजावली. विराट कोहली आणि रोहित शर्मा यांच्यासोबत धोनी हा लीगच्या सर्वात मोठ्या चेहऱ्यांपैकी एक होता. जेव्हा जेव्हा धोनी फलंदाजीसाठी मैदानात उतरायचा, तेव्हा प्रेक्षकांच्या संख्येत आणि उत्साहात प्रचंड वाढ व्हायची.
Leave a Reply