बुधवार, १८ नोव्हेंबर २०२६ ▶
वेगवान महाराष्ट्र महाराष्ट्राच्या ताज्या बातम्या

मराठा आरक्षणासाठी डिसेंबरपासून मराठवाड्यात जनजागृती यात्रा

डिसेंबरपासून मराठवाड्यात तुळजापूर ते कायगाव आरक्षण जनजागृती यात्रा निघणार आहे. कुणबी नोंदींवर ठोस निर्णय न झाल्याने मराठा क्रांती मोर्चा आक्रमक झाला आहे.

मराठा आरक्षणासाठी डिसेंबरपासून मराठवाड्यात जनजागृती यात्रा

मराठा आरक्षणाचा प्रश्न अद्यापही प्रलंबित असून, डिसेंबर महिन्यापासून मराठवाड्यात आरक्षण जनजागृती यात्रा काढली जाणार आहे. मराठा क्रांती मोर्चाच्या राज्यस्तरीय मराठा आरक्षण मंथन परिषदेत हा निर्णय घेण्यात आला. तुळजापूर येथून सुरू होणाऱ्या या यात्रेचा समारोप कायगाव येथे होणार आहे.

परिषदेत काय ठरलं?

देवळाई परिसरात मराठा क्रांती मोर्चाच्या वतीने राज्यस्तरीय मराठा आरक्षण मंथन परिषद आयोजित करण्यात आली होती. या परिषदेत मराठवाड्यातील निमंत्रितांनी आरक्षणाच्या सद्यस्थितीवर चर्चा केली. त्यानंतर झालेल्या पत्रकार परिषदेत पुढील आंदोलनाची दिशा जाहीर करण्यात आली. मराठा आरक्षण समन्वयक रमेश केरे यांनी सोमवारी (दि. १६) यात्रेची माहिती दिली. आरक्षणाचा संघर्ष मराठवाड्यातून सुरू झाल्याने पहिल्या टप्प्यात याच भागात जनजागृती केली जाणार असल्याचे त्यांनी स्पष्ट केले.

नोंदींबाबत खुलासा करण्याची मागणी

राज्यात ५८ लाख कुणबी नोंदी सापडल्याचा दावा सरकारकडून केला जात आहे. मात्र, या नोंदी मराठवाड्यातील आहेत की संपूर्ण राज्यातील, तसेच त्या १९६७ नंतरच्या आहेत का, याबाबत सरकारने स्पष्ट खुलासा करावा, अशी मागणी केरे यांनी केली. हैदराबाद गॅझेटिअर, एसईबीसी आरक्षण आणि कुणबी प्रमाणपत्रांच्या मुद्द्यांवर सरकारने अद्याप ठोस निर्णय घेतलेला नाही, असेही ते म्हणाले. मुख्यमंत्र्यांनी आणि आरक्षण उपसमितीच्या अध्यक्षांनी मराठा समाजाची फसवणूक केल्याचा आरोप त्यांनी केला. मराठवाड्यातील अभ्यासक आणि समन्वयकांची बैठक घेण्याचे आश्वासन मंत्री राधाकृष्ण विखे पाटील यांनी दिले होते, मात्र अद्याप ही बैठक झालेली नाही, असे केरे यांनी सांगितले. आरक्षणाचा प्रश्न मार्गी लावण्याऐवजी समित्या आणि आयोग नियुक्त करून तो लांबविण्याचा प्रयत्न सुरू असल्याचा आरोपही त्यांनी केला.

समाजात फूट पाडण्याचा प्रयत्न थांबवा

सरकारमधील काही प्रतिनिधी संघटनांना बदनाम करून मराठा समाजात वाद निर्माण करण्याचा प्रयत्न करीत असल्याचा आरोप नानासाहेब जावळे यांनी केला. आमचा रोष सरकारच्या धोरणांवर असल्याचे त्यांनी स्पष्ट केले. दरम्यान, मनोज जरांगे आणि आम्ही एकाच उद्देशाने आरक्षणासाठी लढत आहोत. आमच्यात कोणतेही मतभेद नाहीत, असे सांगत त्यांनीही या यात्रेत सहभागी व्हावे, अशी अपेक्षा रमेश केरे यांनी व्यक्त केली. या परिषदेला राजेंद्र दाते पाटील, नानासाहेब जावळे, किशोर चव्हाण, डॉ. शिवानंद भानुसे, भीमराव मराठे, गणेश कदम, राहुल पाटील यांच्यासह मराठवाड्यातील विविध भागांतील समन्वयक उपस्थित होते.

समृद्धी जगताप

Similar Posts

View All

Leave a Reply

Your email address will not be published. Required fields are marked *

ही वेबसाइट AI सहाय्याने व्यवस्थापित केली जाते · This website is managed with AI assistance