पुणे शहरातील एफ. सी. रोडवरील प्रसिद्ध वैशाली आणि रूपाली या दोन्ही रेस्टॉरंटवर अन्न व औषध प्रशासनाने कठोर कारवाई केली आहे. अन्न सुरक्षा नियमांचे गंभीर उल्लंघन तपासणीत आढळल्याने दोन्ही आस्थापनांचे अन्न व्यवसाय परवाने तात्काळ प्रभावाने निलंबित करण्यात आले आहेत. ‘सेफ फूड, सेफ महाराष्ट्र’ मोहिमेअंतर्गत ही कारवाई करण्यात आली असून परवाने पूर्ववत होईपर्यंत दोन्ही रेस्टॉरंटना अन्नपदार्थांची विक्री, पार्सल आणि घरपोच सेवा देता येणार नाही.
तपासणीत काय आढळले?
प्रशासनाच्या पथकाने १३ नोव्हेंबर रोजी दोन्ही रेस्टॉरंटची तपासणी केली. हॉटेल वैशालीच्या तपासणीत स्वयंपाकघरातील जागेचे अयोग्य नियोजन आणि अस्वच्छतेसह अनेक गंभीर त्रुटी आढळल्या. महिलांच्या स्वच्छतागृहाजवळ कच्चा माल ठेवण्यासाठी फ्रीजर ठेवण्यात आला होता, तर पुरुषांच्या स्वच्छतागृहाजवळ डोसा आणि उत्तप्पा तयार करण्याचा तवा ठेवण्यात आला होता. स्वच्छतागृहासमोरील टेबलावर धुतलेली भांडी ठेवण्यात आली होती. उकडलेले बटाटे, शिजवलेला भात आणि अन्य तयार अन्नपदार्थ उघड्या कॉरिडॉरमध्ये ठेवले होते. इडली आणि डोशाचे पीठ तयार करण्याची प्रक्रियाही असुरक्षित जागेत सुरू असल्याचे आढळले. कच्च्या भाज्या तयार अन्नपदार्थांच्या वर ठेवणे, कीटकप्रतिबंधक दरवाजांचा अभाव, तापमानाच्या नोंदी नसणे आणि पिण्याच्या पाण्याचा अद्ययावत तपासणी अहवाल उपलब्ध नसणे अशा त्रुटीही आढळल्या. तपासणीत ९८ पैकी केवळ ५८ गुण मिळाल्याने हॉटेलला नियमांचे पालन न करणारे ठरविण्यात आले.
जूनमधील नोटीसीनंतरही त्रुटी कायम
यापूर्वी जूनमध्ये सुधारणा नोटीस देऊनही त्रुटी कायम राहिल्याने परवाना निलंबित करण्यात आला. सहआयुक्त श्रीकांत करकळे यांच्या मार्गदर्शनाखाली आणि सहायक आयुक्त सय्यद इम्रान हाश्मी यांच्या आदेशानुसार ही कारवाई करण्यात आली. संबंधित रेस्टॉरंटनी सर्व त्रुटी दूर करून पुनर्तपासणीत नियमांची पूर्तता केल्यानंतर आणि प्रशासनाची लेखी परवानगी मिळाल्यानंतरच अन्न व्यवसाय सुरू करता येणार आहे. तोपर्यंत कोणत्याही स्वरूपात अन्नपदार्थांची विक्री करण्यास मनाई करण्यात आली आहे.
Leave a Reply