वाशिम जिल्ह्यात यंदाच्या हंगामात हळदीची लागवड मोठ्या प्रमाणावर झाली. जिल्ह्यातील चार तालुक्यांमध्ये शेतकऱ्यांनी हळदीचे पीक लावले. मात्र पावसाळ्यात पाऊस अत्यंत कमी झाल्याने हे पीक संकटात सापडले आहे. पावसाने पाठ फिरवल्यामुळे धरणे, तलाव, नदी-नाले तसेच शेतकऱ्यांच्या विहिरी आणि बोरवेल कोरड्या पडल्या आहेत. पाण्याअभावी लाखो रुपये खर्च करून जोपासलेले पीक उद्ध्वस्त होण्याच्या मार्गावर आहे.
बाजारात हळदीचे भाव वाढत असल्याचे पाहून शेतकऱ्यांनी मोठ्या आशेने हळद लावण्याचा निर्णय घेतला होता. पावसाळ्यात अपेक्षित पाऊस न झाल्यानेही परतीच्या पावसावर शेतकऱ्यांची आशा होती. परतीचा पाऊस झाला तर जमिनीतील ओलावा वाढेल आणि पाण्याची कमतरता भरून निघेल, अशी अपेक्षा होती. मात्र परतीचा पाऊसही न झाल्याने शेतकऱ्यांच्या आशेवर पाणी फिरले.
हळदीचे पीक जोपासण्यासाठी शेतकऱ्यांनी ऑक्टोबर महिन्याच्या अखेरपर्यंत एकरी जवळपास एक ते दीड लाख रुपये खर्च केले. वाढते बाजारभाव पाहता उत्पादनातून चांगला आर्थिक फायदा होईल, अशी अपेक्षा होती. आता जिल्ह्यातील अनेक भागांतील बोरवेल, विहिरी, नदी आणि तलाव कोरडे पडल्याने हळदीला पाणी देणे अशक्य झाले आहे.
कंझरा गावात निम्मे पीक वाळले
मंगरूळपीर तालुक्यातील कंझरा हे गाव हळद लागवडीसाठी महत्त्वाचे मानले जाते. या एकाच गावात जवळपास २०० एकर क्षेत्रावर हळदीची लागवड करण्यात आली. मात्र यापैकी तब्बल १०० एकर क्षेत्रातील हळद पाण्याअभावी सुकत चालली आहे. त्यामुळे जवळपास निम्म्या हळद क्षेत्राचे नुकसान झाले असून शेतकऱ्यांनी केलेला मोठा खर्च वाया जाण्याची भीती व्यक्त होत आहे.
शेतकऱ्यांची मदतीची मागणी
कर्ज काढून आणि स्वतःच्या पैशांतून लाखो रुपये खर्च करणाऱ्या शेतकऱ्यांना या संकटातून बाहेर काढण्यासाठी शासनाने विशेष मदतीचे पॅकेज जाहीर करावे, अशी मागणी हळद उत्पादक शेतकऱ्यांकडून होत आहे. गावातील शेतकऱ्यांनी सांगितले की, मोठ्या आशेने हळदीचे पीक लावले होते, मात्र बोरवेल आणि विहिरींनी तळ गाठल्यामुळे हळदीला पाणी देणे आता शक्य होत नाही. सुकलेली हळद पाहून मन हेलावून जात असल्याचे त्यांनी सांगितले. शासनाने हळद उत्पादक शेतकऱ्यांना भरीव मदत द्यावी, अशी मागणी शेतकरी करत आहेत.
Leave a Reply