शनिवारीही अमेरिकेतील तीन हजारांहून अधिक उड्डाणे रद्द झाली. शुक्रवारी (१३ नोव्हेंबर) हवाई वाहतूक नियंत्रण यंत्रणेत निर्माण झालेल्या तांत्रिक बिघाडाचे परिणाम दुसऱ्या दिवशीही कायम राहिले. शिकागो, अटलांटा, डॅलस, न्यूयॉर्क, डेन्व्हर आणि लॉस एंजेलिस येथील विमानतळांवर मोठा गोंधळ निर्माण झाला असून, अनेक प्रवासी तासन्तास अडकून पडले आहेत. विमान कंपन्यांना विस्कळीत झालेले वेळापत्रक पूर्वपदावर आणण्यासाठी मोठी कसरत करावी लागत आहे.
साडेचार तास उड्डाणांवर बंदी
फेडरल एव्हिएशन ॲडमिनिस्ट्रेशनने (एफएए) शुक्रवारी देशभरातील उड्डाणांवर तात्पुरती बंदी घातली होती. हवाई वाहतूक नियंत्रण केंद्रांमधील दूरसंचार यंत्रणेत बिघाड झाल्याने रडार आणि संवाद व्यवस्थेकडून विसंगत माहिती मिळत होती. विमानांच्या सुरक्षिततेला प्राधान्य देत हा निर्णय घेण्यात आला. सुमारे साडेचार तासांनंतर रात्री ८.१५ वाजता बंदी उठवण्यात आली. त्या वेळी हजारो विमाने हवेत होती; ती सर्व नियोजित विमानतळांवर सुरक्षितपणे उतरवण्यात आली. शुक्रवारी हजारो उड्डाणे रद्द झाली होती, तर अनेक विमानांना विलंबाचा सामना करावा लागला होता.
प्रवाशांची धावपळ; काहींनी प्रवासच रद्द केला
विमानतळांवर अडकलेल्या अनेक प्रवाशांना पर्यायी विमानांची तिकिटे मिळवण्यासाठी धावपळ करावी लागली, तर काही प्रवाशांनी प्रवास रद्द करण्याचा निर्णय घेतला. विमानसेवा पुन्हा सुरू झाली असली तरी विमानांचे पुनर्नियोजन, वैमानिक आणि कर्मचाऱ्यांची उपलब्धता तसेच वेळापत्रक सुरळीत करण्यासाठी काही दिवस लागू शकतात, असे सांगण्यात येत आहे.
जुन्या यंत्रणेवर अतिरिक्त भार हेच कारण
अमेरिकेच्या प्रशासनाने या संकटामागे जुनी हवाई वाहतूक नियंत्रण यंत्रणा आणि तिचे आधुनिकीकरण करताना निर्माण झालेला तांत्रिक ताण असल्याचे सांगितले. नवीन उपकरणे जोडण्याच्या प्रक्रियेदरम्यान जुन्या यंत्रणेवर अतिरिक्त भार पडल्याने संवाद आणि रडार प्रणालीमध्ये अडचणी निर्माण झाल्या. या घटनेमागे सायबर हल्ला असल्याचे कोणतेही ठोस संकेत नसल्याचे अधिकाऱ्यांनी स्पष्ट केले आहे. मात्र, तपास सुरू आहे. प्रवाशांनी विमानतळाकडे रवाना होण्यापूर्वी संबंधित विमान कंपनीकडून उड्डाणाची स्थिती तपासण्याचे आवाहन करण्यात आले आहे.
Leave a Reply