सोन्या-चांदीच्या दरात गेल्या काही दिवसांपासून सातत्याने चढ-उतार दिसून येत आहेत. सध्या या दोन्ही मौल्यवान धातूंच्या किमतीत बऱ्यापैकी घसरण झाली आहे. मात्र, ही घसरण तात्पुरती असल्याचे संकेत इंडिया बुलियन अँड ज्वेलर्स असोसिएशनच्या अंदाजातून मिळत आहेत. असोसिएशनचे सचिव सुरेंद्र मेहता यांच्या मते, २०२७ च्या अखेरीस सोने आणि चांदीचे दर नव्या उंचीवर पोहोचू शकतात.
मेहता यांच्या अंदाजानुसार, २०२७ च्या शेवटपर्यंत जागतिक बाजारात सोने ६,२०० डॉलर प्रति औंस तर चांदी १८० डॉलर प्रति औंसपर्यंत पोहोचू शकते. या अंदाजानुसार भारतात सोन्याचा दर प्रति १० ग्रॅम १.८७ लाख रुपयांच्या पुढे जाईल, तर चांदीचा दर ५,४५,१०० रुपये प्रति किलोग्रॅमपर्यंत जाण्याची शक्यता आहे.
सध्या दर का घसरत आहेत?
सोन्या-चांदीच्या दरात घसरण होण्यामागे अनेक कारणे असल्याचे मेहता यांनी सांगितले. कच्च्या तेलाच्या किमतीपासून ते अमेरिकेतील व्याजदरांबाबत असलेली अनिश्चितता यांचा यात समावेश आहे. अमेरिकेची मध्यवर्ती बँक असलेली फेडरल रिझर्व्ह पुढील पाऊल काय उचलणार, याबद्दल अजून स्पष्टता नाही. त्यामुळे या मौल्यवान धातूंवर दबाव कायम राहू शकतो. बाजाराचे लक्ष आता फेडरल रिझर्व्हच्या डिसेंबर महिन्यातील धोरणाकडे लागले आहे. सध्याची अस्थिरता कायम राहू शकते आणि किमतींची दिशा विविध जागतिक घटकांवर अवलंबून असेल.
सणासुदीत विक्रीत वाढ
दर घसरलेले असतानाच अनेकांनी सोने-चांदी खरेदीची संधी साधली. धनत्रयोदशी आणि दिवाळीच्या काळात ६१ ते ६२ टनांहून अधिक सोन्याची विक्री झाली. याच काळात ३३० ते ३४० टन चांदीची विक्री झाली. कमी किमती, लग्नसराईचा काळ आणि आगाऊ बुकिंग करण्याचा वाढता कल यामुळे खरेदीला चालना मिळाली. मेहता यांच्या मते, पुढील काही काळ सोने आणि चांदीवर दबाव राहील, पण जागतिक बाजारात या धातूंची मागणी वाढत असल्याचे संकेत दिसत आहेत. त्यामुळे सध्याच्या घसरणीकडे दुर्लक्ष न करता गुंतवणूकदारांनी सोन्याकडे लक्ष द्यावे, असे त्यांचे मत आहे.
स्रोत: मूळ बातमी
Leave a Reply