राज्यातील शेतकऱ्यांसाठी महत्त्वाची बातमी आहे. ऐन दुष्काळात राज्य सरकारने शेतकऱ्यांसाठी आणखी एक मोठा निर्णय घेतला आहे. ई-पीक पाहणीच्या नोंदणीसाठी ३० नोव्हेंबरपर्यंत मुदतवाढ देण्यात आली आहे. महसूल मंत्री चंद्रशेखर बावनकुळे यांनी ही घोषणा केली आहे.
शेतकऱ्यांनी आपल्या शेतातील पिकांची अचूक नोंद ई-पीक पाहणी प्रणालीमध्ये करणे आवश्यक आहे. या नोंदींच्या आधारे शासनाच्या विविध कृषीविषयक योजनांचा लाभ, अनुदान तसेच इतर शासकीय सवलती मिळवताना मदत होते. त्यामुळे प्रत्येक शेतकऱ्याच्या शेतातील प्रत्यक्ष पीक परिस्थितीची अचूक नोंद होणे महत्त्वाचे आहे.
नोंदणी का रखडली होती?
ई-पीक पाहणीची नोंदणी करताना अनेक शेतकऱ्यांना तांत्रिक अडचणींचा सामना करावा लागत असल्याच्या तक्रारी समोर आल्या होत्या. मोबाईल अॅपमधील तांत्रिक अडचण, जीओ लोकेशनमधील त्रुटी, गावांच्या नकाशातील तफावत तसेच गट क्रमांकासंदर्भातील समस्यांमुळे अनेक शेतकऱ्यांची नोंदणी पूर्ण होऊ शकलेली नव्हती.
मुदतवाढीमुळे काय होणार?
या मुदतवाढीमुळे तांत्रिक अडचणींमुळे नोंदणीपासून वंचित राहिलेल्या शेतकऱ्यांना आपली पीक नोंदणी पूर्ण करण्यासाठी अतिरिक्त वेळ मिळणार आहे. दरम्यान, पीक पाहणी नोंदणी प्रक्रियेला गती देण्यासाठी तलाठी स्तरावर आवश्यक कार्यवाही वेगाने पूर्ण करण्याचे निर्देशही महसूल विभागाकडून देण्यात आले आहेत.
स्रोत: मूळ बातमी
Leave a Reply