सध्या एका लोकप्रिय मालिकेत वसू आत्याची भूमिका साकारणाऱ्या अभिनेत्री संयोगिता भावे यांनी नुकत्याच एका मुलाखतीत आपल्या आयुष्यातील सर्वांत कठीण काळाबद्दल मनमोकळेपणाने सांगितले. कॅन्सरशी त्यांनी दिलेला लढा आणि त्या काळात आलेले अनुभव त्यांनी श्रोत्यांसमोर मांडले.
संयोगिता यांच्या आईला स्तनाचा कॅन्सर झाला होता. त्यानंतर त्यांना लिम्फोमा हा आजारही झाला. दुर्दैवाने आईला वाचवता आले नाही. आई हेच आपले सर्वस्व असल्याचे सांगत, त्यांच्या जाण्याचे दुःख सहन करणे किती अवघड होते, हे संयोगिता यांनी सांगितले.
आईच्या आजारानंतर स्वतःची तपासणी
आईला स्तनाचा कॅन्सर असल्यामुळे डॉक्टरांनी संयोगिता यांना स्वतः तपासणी कशी करायची हे शिकवले होते. त्या नियमितपणे तशी तपासणी करत होत्या. मार्च २०१८ मध्ये त्यांना एक छोटीशी गाठ जाणवली. त्यांनी फाइन नीडल चाचणी करून घेतली. तेव्हा ती गाठ कॅन्सरची नसल्याचे समोर आले.
मात्र जानेवारी-फेब्रुवारी २०१९ मध्ये डाव्या स्तनात बऱ्यापैकी गाठी जाणवू लागल्या. त्या फायब्रॉइड आहेत की आणखी काही, हे त्यांना कळत नव्हते. डॉक्टरांचा सल्ला घेतल्यानंतर त्यांनी मॅमोग्राम करण्याचा सल्ला दिला. नोव्हेंबरमध्ये मॅमोग्राम केल्यावर एकत्रित गाठींचा समूह असल्याचे लक्षात आले. त्यात सोळा छोटे नोड होते. त्यानंतर केलेली नीडल चाचणी पॉझिटिव्ह आली.
ही बातमी समजताच संयोगिता यांना मोठा धक्का बसला. शस्त्रक्रिया केली तर काम थांबेल आणि उपचारांचे दुष्परिणाम होतील, अशी चिंता त्यांना होती. त्यानंतर त्यांनी दुसऱ्या डॉक्टरांचा सल्ला घेतला. पेट स्कॅनमध्ये कॅन्सर अजून पसरलेला नसल्याचे समजले. त्यानंतर लगेच शस्त्रक्रिया करण्याचा निर्णय घेण्यात आला.
शस्त्रक्रिया आणि उपचारांचा प्रवास
रुग्णालयात मराठी मालिकेत काम करणारी अभिनेत्री आली आहे, हे सगळ्यांना कळले होते. त्या अवस्थेतही काही लोक फोटो काढण्यासाठी येत होते. संयोगिता वेगळ्याच मानसिक स्थितीत होत्या. शस्त्रक्रियेपूर्वी त्यांना भूल देण्यात आली तेव्हा त्यांनी श्रीराम जय राम जय जय राम असा जप सुरू केला. शस्त्रक्रिया कधी झाली हे त्यांनाही कळले नाही. शुद्धीवर येताना त्या फक्त ‘मी बरी आहे, तुम्ही कसे आहात?’ एवढेच म्हणत होत्या. या सकारात्मक वृत्तीचा आपल्याला खूप फायदा झाल्याचे त्यांनी सांगितले.
मात्र शस्त्रक्रियेनंतर त्यांना संसर्ग झाला. त्यामुळे आणखी वीस दिवस गेले. त्यानंतर किमोथेरपी सुरू झाली. एकवीस दिवसांच्या अंतराने एकूण सहा किमोथेरपी देण्यात आल्या. पहिल्या किमोनंतर त्यांना आहाराबाबत मार्गदर्शन करण्यात आले. रोज चार अंडी, सुकामेवा खाण्याचा सल्ला देण्यात आला; कच्चे अन्न टाळायचे होते. त्या शाकाहारी असल्या तरी उपचारादरम्यान रोज अंडी खावी लागत होती. किमोच्या औषधांमुळे शरीरात प्रथिने वाढवणे आवश्यक असते. डॉक्टर आणि परिचारिका त्यांची खूप काळजी घेत होते. सुरुवातीला त्यांना संयोगिता अभिनेत्री असल्याचे माहीत नव्हते; नंतर कळल्यावर ते गप्पा मारण्यासाठी येत असत, असेही त्यांनी सांगितले.
स्रोत: मूळ बातमी
Leave a Reply