केवळ २५ लाख रुपयांच्या गुंतवणुकीतून उभ्या राहिलेल्या लेन्सकार्टने आज १.२५ लाख कोटी रुपयांचे बाजारमूल्य गाठले आहे. ही यशोगाथा आहे देशातील आघाडीच्या आयवेअर ब्रँडची. या व्यवसायाच्या उभारणीत पियूष बन्सल यांनी स्वतःची नोकरीही पणाला लावली. ते अमेरिकेत मायक्रोसॉफ्टमध्ये नोकरी करत होते. मात्र, बाजारात व्यावसायिक संधी दिसताच त्यांनी स्वतःच्या बचतीचे २५ लाख रुपये गुंतवून लेन्सकार्टची पायाभरणी केली. अमित चौधरी, सुमित कपाही आणि नेहा बन्सल या तिघांनीही या प्रवासात त्यांना साथ दिली.
बाजारातील पोकळी ठरली संधी
लेन्सकार्ट सुरू करण्यापूर्वी बन्सल यांनी अनेक वेगवेगळे उपक्रम केले होते. सर्चमायकॅम्पस या संकेतस्थळाच्या माध्यमातून विद्यार्थ्यांना पुस्तके, घरे आणि इंटर्नशिप शोधण्यात मदत केली. व्हॅल्यू टेक्नॉलॉजीजच्या माध्यमातून ऑनलाइन दागिने, बॅगा आणि घड्याळेही विकली. ई-व्यवसायात काम करताना त्यांच्या लक्षात आले की, भारतात चष्मा वापरणारे अनेक जण आहेत. मात्र, त्यातील बहुतेकांना स्टायलिश आणि उत्तम दर्जाचे चष्मे परवडत नसल्याने ते स्वस्त आणि निकृष्ट दर्जाचे चष्मे वापरतात. यातूनच त्यांना व्यवसायाची कल्पना सुचली. चष्म्याचा बहुतांश खर्च मधल्या दलालांमुळे वाढतो, हे लक्षात घेऊन लेन्सकार्टने मधले सर्व दलाल बाजूला सारले आणि स्वतः चष्म्यांची निर्मिती करून ते थेट ग्राहकांपर्यंत पोहोचवण्याची युक्ती शोधली.
तंत्रज्ञानाने दिली व्यवसायाला दिशा
सुरुवातीला लेन्सकार्टसमोर ग्राहक मिळवणे हे सर्वात मोठे आव्हान होते. चष्मा व्यक्तीच्या दिसण्याचे संपूर्ण स्वरूप बदलू शकतो, त्यामुळे निवडलेला चष्मा आपल्या चेहऱ्याला शोभेल का, हा प्रश्न ऑनलाइन खरेदीपूर्वी प्रत्येक ग्राहकाला पडतो. यावर तोडगा काढण्यासाठी लेन्सकार्टने थ्रीडी व्हर्च्युअल ट्राय-ऑन तंत्रज्ञान सुरू केले. या सुविधेमुळे ग्राहकांना मोबाईलवरच निवडलेला चष्मा आपल्याला शोभेल का, हे पाहता येते. त्याचबरोबर घरी जाऊन दिलेल्या मोफत डोळ्यांच्या तपासणीने ग्राहकांचा विश्वास जिंकला. साध्या कॉन्टॅक्ट लेन्सपासून सुरुवात केलेल्या या ब्रँडकडे आज साध्या चष्म्यांपासून प्रीमियम दर्जाचे चष्मे उपलब्ध आहेत. व्हिन्सेंट चेस, जॉन जेकब्स, लेन्सकार्ट एअर आणि ॲक्वालेन्स या वेगवेगळ्या दर्जाच्या चष्म्यांनी ब्रँडच्या वाढीला गती दिली. आज देशभरात लेन्सकार्टची ३,६०० पेक्षा अधिक दुकाने आहेत.
स्रोत: मूळ बातमी
Leave a Reply