भारत-पाकिस्तान अंतिम सामना: १९१ धावांच्या पराभवाचा बदला?

१९ वर्षांखालील आशिया कप २०२६ च्या विजेतेपदासाठी भारत आणि पाकिस्तान यांच्यात अंतिम सामना रंगणार आहे. उपांत्य फेरीत भारताने अफगाणिस्तानचा आठ विकेट्सनी धुव्वा उडवत दिमाखात अंतिम फेरी गाठली, तर पाकिस्तानने बांगलादेशला पराभूत करून फायनलमध्ये प्रवेश केला. त्यामुळे आता दोन्ही पारंपरिक प्रतिस्पर्ध्यांमध्ये विजेतेपदासाठी थेट लढत होणार आहे.

उपांत्य फेरीत भारताचा दमदार विजय

उपांत्य फेरीत अफगाणिस्तानने भारतासमोर विजयासाठी २२८ धावांचे लक्ष्य ठेवले होते. भारतीय फलंदाजांनी आक्रमक फलंदाजी करत अवघ्या ३६.५ षटकांत हे लक्ष्य गाठले. कर्णधार लक्ष्य रायचंदानीने ९० चेंडूंमध्ये १३ चौकार आणि एका षटकाराच्या मदतीने ९३ धावांची शानदार खेळी केली. त्याचे शतक अवघ्या सात धावांनी हुकले. याशिवाय, युएईविरुद्ध १६० धावांची खेळी करणाऱ्या आर्यवीर सेहवागने ५१ धावांचे योगदान दिले, तर व्ही. के. विनीतने ५७ धावांवर नाबाद राहत भारताच्या विजयावर शिक्कामोर्तब केले.

अफगाणिस्तानविरुद्धच्या विजयानंतर बोलताना कर्णधार लक्ष्य रायचंदानीने अंतिम सामना शानदार होईल, अशी अपेक्षा व्यक्त केली. प्रत्येकजण या सामन्याची आतुरतेने वाट पाहत असून मैदानावर चांगली कामगिरी करण्याची आशा त्याने व्यक्त केली. शतकापासून अवघ्या सात धावा दूर राहिल्याबद्दल त्याने निराशा व्यक्त केली, मात्र संघाने विजय मिळवला हेच आपल्यासाठी सर्वात महत्त्वाचे असल्याचे त्याने सांगितले. आपण फक्त नैसर्गिक खेळ खेळण्याचा आणि परिस्थितीनुसार फलंदाजी करण्याचा प्रयत्न केल्याचे त्याने नमूद केले.

या सामन्यात भारतीय गोलंदाजांनी केलेल्या कामगिरीचेही लक्ष्यने कौतुक केले. नाणेफेक गमावूनही संघाने आखलेल्या रणनीतीनुसार खेळ केल्याचा फायदा झाल्याचे त्याने सांगितले. मधल्या षटकांमध्ये अचूक गोलंदाजीची अपेक्षा होती आणि गोलंदाजांनी ती जबाबदारी उत्तमरीत्या पार पाडल्याचे त्याने म्हटले. सामन्यात आघाडी कायम ठेवण्यासाठी दीर्घकाळ अशीच कामगिरी करण्याची गरज असल्याचेही त्याने नमूद केले.

गेल्या वर्षीच्या पराभवाचा बदला?

भारतीय कर्णधार लक्ष्य रायचंदानी या अंतिम सामन्यासाठी प्रचंड उत्सुक असून, गतवर्षीच्या पराभवाचा वचपा काढण्याची भारताला संधी मिळाली आहे. २०२५ च्या अंतिम सामन्यात आयुष म्हात्रेच्या नेतृत्वाखाली खेळणाऱ्या भारतीय संघाला पाकिस्तानकडून १९१ धावांनी पराभव स्वीकारावा लागला होता. आता त्या पराभवाचा बदला घेण्याचे आव्हान टीम इंडियासमोर असेल.

१९ वर्षांखालील आशिया कपच्या इतिहासात भारतीय संघ सर्वाधिक यशस्वी ठरला आहे. पाकिस्तान आणि बांगलादेशने प्रत्येकी दोन वेळा चषकावर नाव कोरले आहे. विशेष म्हणजे, २०२४ मध्ये बांगलादेश आणि २०२५ मध्ये पाकिस्तानकडून भारताला अंतिम सामन्यात पराभवाचा सामना करावा लागला होता. त्यामुळे यंदा पाकिस्तानला नमवून विजेतेपद पटकावण्याची भारताकडे मोठी संधी आहे.

स्रोत: मूळ बातमी