मुंबईतील बाणगंगा परिसरात छटपूजेच्या आयोजनावरून वाद निर्माण झाला आहे. छटपूजेच्या तयारीसाठी महापालिकेच्या डी वॉर्डमध्ये बैठक होणार असल्याची माहिती मिळताच मनसे कार्यकर्ते आक्रमक झाले. कार्यकर्त्यांनी या आयोजनाला विरोध करत जोरदार घोषणाबाजी केली आणि बैठक उधळून लावण्याचा इशारा दिला.
डी वॉर्डमधील बैठकीवरून वाद
बाणगंगेमध्ये छटपूजेच्या तयारीसाठी डी वॉर्डमध्ये बैठक सुरू झाल्यानंतर मनसे पदाधिकारी आणि कार्यकर्त्यांनी आक्रमक भूमिका घेतली. मुंबई महापालिकेच्या सहायक आयुक्तांच्या उपस्थितीमध्ये ही बैठक पार पडणार असल्याची माहिती समोर आली होती. त्यानंतर मनसे कार्यकर्त्यांनी ‘काहीही झालं तरी बाणगंगेत छटपूजा होऊ देणार नाही,’ अशी भूमिका घेतली. बैठकीच्या ठिकाणी पोहोचलेल्या कार्यकर्त्यांनी बैठक उधळून लावण्याचा इशारा दिला.
कोणतीही बैठक नसल्याचे मनसे कार्यकर्त्यांना कळवण्यात आले. मात्र, जोपर्यंत अधिकृतरित्या छटपूजा रद्द करण्यासंबंधीची माहिती येत नाही, तोपर्यंत आपण हटणार नाही, अशी भूमिका मनसेने घेतली आहे. आवश्यक पडल्यास रस्त्यावर उतरण्याचाही इशारा मनसेने दिला आहे.
मनसेची भूमिका आणि सवाल
मनसे कार्यकर्त्यांनी माध्यमांशी बोलताना आपली भूमिका मांडली. त्यांचे सण-उत्सव आहेत, त्यांनी ते नक्की करावेत, याला विरोधाचे कारण नाही. पण त्यांनी ते त्यांच्या राज्यामध्ये करावेत, इथे त्यांनी शक्तीप्रदर्शन करू नये, असे मत मनसे कार्यकर्त्यांनी मांडले. ही छटपूजा कोणासाठी केली जाते आणि प्रशासन ती करण्यासाठी का आग्रही आहे, असा सवालही त्यांनी उपस्थित केला. छटपूजेसाठी स्टेज का तयार करून दिला जात आहे, असा प्रश्नही मनसेने विचारला.
आमदार लोढा मिटिंग घेतात, तुम्ही हिंदू उत्सवांसाठी काय करता, असा सवाल मनसेने केला. बाणगंगा तलावामध्ये गणपती विसर्जन किंवा देवीचे विसर्जन करू दिले जात नाही, मग छटपूजेचे उत्सव साजरे करण्यासाठी प्रशासन कसे तयार होते, असा प्रश्नही मनसेने उपस्थित केला. पितृपक्षाच्या काळात बाणगंगा येथे मोठे जलप्रदूषण झाले होते. मासे मृत पावले होते आणि संपूर्ण परिसरात दुर्गंधी पसरली होती, असे मनसेने म्हटले आहे.
उत्तर प्रदेशात निवडणुका आहेत, म्हणून भाजप हे राजकारण करू पाहत आहे, अशी टीकाही मनसेने केली आहे. या वादामुळे बाणगंगा परिसरातील छटपूजेच्या आयोजनाकडे सर्वांचे लक्ष लागले आहे.
स्रोत: मूळ बातमी
Leave a Reply