जळकोटमार्गे उदगीर ते नांदेड या मार्गावर प्रवास करणाऱ्या प्रवाशांसाठी दिलासादायक बातमी आहे. नांदेड विभागाने बुधवारपासून जळकोटमार्गे तीन नव्या बस सुरू केल्या आहेत. त्यामुळे या मार्गावरील प्रवाशांची अनेक वर्षांपासूनची अडचण दूर होणार आहे.
अनेक वर्षांची मागणी अखेर मान्य
जळकोटमार्गे उदगीर ते नांदेड या मार्गावर बससेवेची कमतरता अनेक वर्षांपासून जाणवत होती. यापूर्वी उदगीर आगारातून दिवसभरात केवळ सहा बसफेऱ्या होत होत्या. त्यातही सकाळी नऊनंतर जळकोटमार्गे नांदेडला जाण्यासाठी बस मिळत नसे. त्यामुळे प्रवाशांना बसची वाट पाहत तासनतास थांबावे लागत होते.
प्रवाशांची ही गैरसोय दूर करण्यासाठी नांदेड आगारातूनही जळकोटमार्गे बससेवा सुरू करावी, अशी मागणी विकास परिषदेकडून अनेक दिवसांपासून केली जात होती. जळकोट येथील विकास परिषद, सामाजिक कार्यकर्ते आणि प्रवाशांनी नांदेडच्या आगारप्रमुखांकडे सातत्याने पाठपुरावा केला. प्रवाशांची होणारी हेळसांड लक्षात घेऊन नांदेड येथील विभाग नियंत्रकांनी अखेर जळकोटमार्गे उदगीरसाठी तीन बस सुरू केल्या. राज्याचे परिवहनमंत्री प्रताप सरनाईक यांनीही जळकोटमार्गे नांदेड ते उदगीर बससेवा वाढवण्याबाबत सूचना दिल्या होत्या.
नवे वेळापत्रक असे
नव्या वेळापत्रकानुसार बुधवारपासून नांदेड बसस्थानकातून सकाळी सात, आठ आणि नऊ वाजता, तसेच दुपारी १.४५, २.३० आणि ३.३० वाजता बस सुटणार आहेत. उदगीर बसस्थानकातून सकाळी १०.३०, ११.१५ आणि १२.१५ वाजता, तसेच सायंकाळी पाच, सहा आणि सात वाजता बस सुटतील. या बस जळकोटमार्गे धावणार असल्याने दोन्ही बाजूंनी प्रवाशांना दिवसभरात सहावेळा प्रवासाची सुविधा उपलब्ध होणार आहे. नव्या सेवेमुळे या मार्गावरील प्रवाशांचा प्रवास आता सुखकर होणार आहे.
स्रोत: मूळ बातमी
Leave a Reply