महाराष्ट्राचे राजकारण सध्या दोन्ही राष्ट्रवादी काँग्रेसच्या विलिनीकरणाभोवती केंद्रीत झाले आहे. मागच्या आठवड्यापासून दोन्ही राष्ट्रवादी काँग्रेसमध्ये ज्या घडामोडी घडत आहेत, त्यावरून दोन्ही राष्ट्रवादी एकत्र येणार का, हीच चर्चा रंगली आहे. अजित पवार यांनी राष्ट्रवादीचे नेते शरद पवार यांची भेट घेतली; त्यावेळी त्यांचा मुलगा पार्थ पवार सुद्धा सोबत होता. दोन्ही राष्ट्रवादीच्या विलिनीकरणाबद्दल येणाऱ्या बातम्यांवरून विविध तर्क-वितर्क लढवले जात आहेत. एकनाथ शिंदे यांच्या शिवसेनेचे नेते आणि मंत्री संजय शिरसाट यांनी दोन्ही राष्ट्रवादीच्या विलिनीकरणाबद्दल मत मांडले. पण त्यावरून त्यांच्यात आणि राष्ट्रवादी काँग्रेसमध्ये वाद सुरू झाला आहे.
शिरसाट यांनी नेमके काय म्हटले होते?
कोणताही निर्णय घेताना आपल्या समविचारी पक्षांना, महायुतीमधल्या पक्षांना विचारावे जरूर लागेल, असे शिरसाट म्हणाले. इतक्या लवकर ते काय निर्णय घेत आहेत, हे सांगणे कठीण आहे. त्यामुळे अजित पवार यांची राष्ट्रवादी असेल किंवा शरद पवार यांची राष्ट्रवादी, त्यांच्यात नेमक्या काय घडामोडी सुरू आहेत, त्यावर भाष्य करणे आजच्या घडीला उचित नाही, असे त्यांनी स्पष्ट केले.
राष्ट्रवादीच्या विलिनीकरणाबद्दल शिरसाट यांनी केलेल्या विधानावर हसन मुश्रीफ यांनी प्रतिक्रिया दिली. शिरसाट यांनी बोलू नये, महायुतीत मिठाचा खडा टाकू नका आणि एकनाथ शिंदे यांनी शिरसाट यांना समज द्यावी, असे मुश्रीफ म्हणाले.
मुश्रीफ यांच्या टीकेनंतर शिरसाट यांची आक्रमक प्रतिक्रिया
त्यावर संजय शिरसाट यांनी आक्रमक प्रतिक्रिया दिली. मुश्रीफ यांनी आपले विधान नीट ऐकलेले दिसत नाही, असे शिरसाट म्हणाले. आधी नीट ऐकून घ्यावे, असे त्यांनी सांगितले. दरवेळी काहीही आरोप केले तर ते सहन करणार नाही, असे त्यांनी खात्रीने सांगितले. आपसात सुरू असलेल्या वादामुळे तिसरा पक्ष उदयाला येऊ शकतो, असे आपण म्हटल्याचे त्यांनी स्पष्ट केले. राष्ट्रवादीवर आपण कोणती टीका केली, असा सवालही त्यांनी केला.
काय चालले आहे, हे आपण चांगल्या प्रकारे जाणतो, असेही शिरसाट म्हणाले. अशी विधाने करू नका, अशी विनंती त्यांनी केली. मला बोलायला भाग पाडू नका; नाहीतर मी कोणतीही दयामाया ठेवणार नाही, असा इशाराही त्यांनी दिला.
स्रोत: मूळ बातमी
Leave a Reply