घर घेणे हे बहुतेक लोकांसाठी आयुष्यभराचे स्वप्न असते. घरांच्या किमती आकाशाला भिडलेल्या असताना अवघ्या १५४ रुपयांत दोन खोल्यांचा फ्लॅट मिळाला, तर कुणालाही आश्चर्य वाटेल. चीनमध्ये नेमके असेच घडले आहे. तेथील एका तरुणाने ऑनलाइन लिलावाच्या माध्यमातून केवळ ११ युआन म्हणजे सुमारे १५४ रुपयांत २BHK फ्लॅट खरेदी केला आहे. हा फ्लॅट ७३१.९५ चौरस फूट क्षेत्रफळाचा असून तो चीनच्या हेइलोंगजियांग प्रांतात आहे.
लिलाव कसा झाला?
हा लिलाव अलिबाबा ऑक्शन या व्यासपीठावर डबल ११ या विशेष सवलतीच्या मोहिमेअंतर्गत झाला. लिलावाची सुरुवात केवळ १ युआनपासून झाली. त्यानंतर बोली ०.०१ युआनच्या छोट्या टप्प्यांनी वाढत गेली. अखेर सर्वाधिक बोली ११ युआनची लागली. जो व्यक्ती सर्वप्रथम ११ युआनची बोली लावेल, त्यालाच फ्लॅट मिळणार होता. या लिलावात एकूण १,६७७ लोकांनी भाग घेतला आणि एकूण १,००१ बोली लागल्या. ५ नोव्हेंबर रोजी लिलाव संपला तेव्हा जियांग्सू-झेजियांग भागातील एका अनाम खरेदीदाराने केवळ ११ युआनमध्ये फ्लॅट आपल्या नावे केला.
स्वस्त फ्लॅटमागील खरा खर्च
फ्लॅट केवळ १५४ रुपयांना पडला, हे ऐकायला आकर्षक वाटत असले तरी त्यामागील वास्तव वेगळे आहे. स्थानिक मालमत्ता अॅप्सनुसार या फ्लॅटची बाजारभावानुसार किंमत सुमारे ४०,००० युआन होती. त्याच संकुलातील पुनर्विक्रीच्या मालमत्तांची सरासरी किंमत प्रति चौरस मीटर २,७०० युआन असल्याचे सांगितले जाते. लिलाव संस्थेच्या माहितीनुसार, मालमत्तेची खरी किंमत आणि सवलतीच्या विक्री किमतीतील फरक व्यासपीठाकडून अनुदानाच्या रूपात भरून काढला जाणार आहे. खरेदीदाराला मात्र २,००० युआन म्हणजे सुमारे २८ हजार रुपयांचा डीड टॅक्स द्यावा लागणार आहे. त्याशिवाय मालमत्तेशी संबंधित इतर खर्चही त्यालाच भरावे लागतील. खरेदीदाराने लिलावाच्या थेट प्रक्षेपणात सांगितले की, तो हेइलोंगजियांगला राहायला जाणार नाही. या फ्लॅटचा वापर तो केवळ हिवाळ्यातील सुट्टी घालवण्यासाठी करणार आहे.
केवळ ११ युआनमध्ये फ्लॅट मिळाल्याची बातमी समजताच समाजमाध्यमांवर मोठी चर्चा सुरू झाली आहे. काहींनी हा व्यवहार कमालीचा फायदेशीर असल्याचे म्हटले आहे, तर काहींनी या मालमत्तेवर पुढे किती खर्च येणार, असा प्रश्न उपस्थित केला आहे. कायदेशीर सल्लागारांनी मात्र अशा स्वस्तातील मालमत्ता खरेदीपासून सावध राहण्याचा सल्ला दिला आहे. अशा मालमत्तांच्या मालकी हक्क, भरलेला कर, शुल्क आणि कायदेशीर वाद यांसारख्या अडचणी निर्माण होऊ शकतात, असे तज्ज्ञांचे म्हणणे आहे.
स्रोत: मूळ बातमी
Leave a Reply